Dowladda Turkiga ayaa si adag u cambaareysay weerar dhimasho sababay oo lagu beegsaday dad rayid ah oo barakacayaal ah, kaas oo ka dhacay gobolka Waqooyiga Kordofan ee dalka Suudaan, iyadoo muujisay murugo qoto dheer oo ku aaddan khasaaraha nafeed ee ka dhashay weerarkaasi.

Bayaan Axaddii ay soo saartay Wasaaradda Arrimaha Dibadda Turkiga ayaa lagu yiri: “Waxaan murugo weyn ku ogaannay in dad rayid ah oo badan ay naftooda ku waayeen weerar ay maleeshiyada RSF ku qaadeen gaari siday dad barakacayaal ah oo ku sugnaa gobolka Waqooyiga Kordofan ee Suudaan.”

Waxa ay sheegtay in dhacdadani ay ku lug lahayd gaari siday dad rayid ah oo lagu qasbay inay ka cararaan guryahooda sababo la xiriira colaadda ka socota dalka.

“Weerarkan wuxuu yahay ku xadgudub cad oo culus oo ka dhan ah sharciga caalamiga ah ee bani’aadannimada, gaar ahaan ilaalinta dadka rayidka ah iyo kaabayaasha rayidka inta lagu jiro colaadaha hubeysan,” ayay tiri wasaaraddu.

Ankara ayaa adkaysay in aan marna la beegsan karin dadka rayidka ah iyo kaabayaasha rayidka inta lagu jiro colaadaha hubeysan.

“Waxaan si adag u cambaareyneynaa weerarrada ka dhanka ah dadka rayidka ah,” ayaa lagu yiri bayaanka.

Bartilmaameedsiga kolonyada WFP

Dawladda Turkiga ayaa sidoo kale mar kale ku celisay baaqeeda ku aaddan qaadashada tallaabooyin lagu xaqiijinayo badbaadada dadka ay saameeyeen colaadda.

“Waxaan mar kale ku baaqeynaa in la xaqiijiyo marin ammaan ah oo aan caqabad lahayn oo ay helaan dadka rayidka ah, iyo in gargaar bani’aadannimo si caqabad la’aan ah loo gaarsiiyo,” ayay wasaaraddu ku dartay.

Sabtidii, dowladda Suudaan ayaa ku eedeysay RSF inay fuliyeen weerar diyaarad drone ah oo lagu bartilmaameedsaday kolonyo gargaar oo ay lahayd Hay’adda Cunnada Adduunka (WFP) oo maraysay Waqooyiga Kordofan, taasoo keentay khasaaro nafeed iyo burbur ku yimid sahayda gargaarka.

Dhanka kale mas’uuliyiinta Suudaan ayaa ku dhawaaqay in 24 qof oo rayid ah la dilay, kuwo kale oo ay ku jiraan haween, carruur iyo waayeelna ay dhaawacyo soo gaareen, kadib markii RSF ay bartilmaameedsadeen gaari siday dad barakacayaal ah oo ku sugnaa magaalada Al-Rahad ee Waqooyiga Kordofan.

Ciidamada Suudaan ayaa 25-kii Janaayo sheegay inay ka hortageen weerar la mid ah oo ay RSF iyo maleeshiyaad la garab ah ku qaadeen deegaannada Al-Silik iyo Malkan ee gobolka Blue Nile.

18-ka gobol ee Suudaan, RSF ayaa gacanta ku haysa dhammaan shanta gobol ee ku yaalla galbeedka Darfur, marka laga reebo qaybo ka mid ah Waqooyiga Darfur oo weli ay maamulaan ciidamada dowladda. Dhanka kale, ciidamada Suudaan ayaa gacanta ku haya inta badan 13-ka gobol ee kale ee ku kala yaalla koonfurta, waqooyiga, bariga iyo bartamaha dalka, oo ay ku jirto caasimadda Khartoum.

Colaadda u dhaxaysa ciidamada Suudaan iyo RSF, oo qaraxday bishii Abriil 2023, ayaa sababtay dhimashada kumannaan qof, barakaca malaayiin kale, waxayna abuurtay mid ka mid ah qalalaasaha bani’aadannimo ee ugu daran caalamka.