Guddoomiyaha Guddiga Midowga Afrika, Mahmoud Ali Youssouf, ayaa cambaareeyay isku day kasta oo awoodda xoog lagula wareegayo, kaddib markii ciidamada Niger ay fashiliyeen gadood ay sameeyeen askar ka tirsan milatariga.
Midowga Afrika ayaa sheegay in Youssouf uu walaac ku hayay iska horimaadyadii hubeysnaa ee ka dhacay goobo muhiim ah oo ku yaalla caasimadda Niamey, isagoo ugu baaqay dhammaan dhinacyada inay is-xakameeyaan oo ay ilaaliyaan ammaanka shacabka iyo xasilloonida dalka.
Rabshadaha ayaa sababay dhimashada shan qof, sida ay warbaahintu sheegtay, waxaana saddex ka mid ah ay ahaayeen ilaalada madaxtooyada. Midowga Afrika ayaa sidoo kale ku celiyay baaqiisa ku aaddan “soo celinta nidaamka dastuuriga ah.”
Hoggaamiyaha Niger, General Abdourahamane Tiani, ayaan si fagaare ah uga hadlin gadoodka, balse xafiiskiisa ayaa sheegay inuu telefoon kula hadlay Madaxweynaha Algeria Abdelmadjid Tebboune. Algeria ayaa sidoo kale diyaarado dagaal u dirtay Niamey codsi uga yimid Niger, si loo xoojiyo iskaashiga istaraatiijiga ah ee labada dal, gaar ahaan dhinaca milatariga.
