Hay’adaha ammaanka ee dalka Kenya ayaa xoojiyay hawlgalladooda dhinaca ammaanka ee deegaannada Tseikuru iyo Ukasi ee bariga dalkaas, kadib weeraro dambiyo ah oo is xigxigay. Mas’uuliyiinta ayaa dhacdooyinkan ku tilmaamay kuwo gooni ah oo ay geysteen shakhsiyaad kooban oo abaabulan.
Qoraal kasoo baxay Taliska Ciidanka Booliska Kenya (NPS) ayaa lagu qiray walaaca isa soo taraya ee soo wajahay dadka deegaanka, balse waxaa la adkeeyay in rabshadahan aan loo arkin kuwo metelaya bulsho ama koox gaar ah.
“Kuwani waa fal-dambiyeedyo gooni ah oo ay geysteen shakhsiyaad kooban oo ka dhex dhashay bulshooyinkeenna,” ayuu yiri boolisku, iyagoo ka digay faafinta warar abuuri kara xiisado hor leh oo ka dhex dhasha deegaannadaas oo taariikh ahaan caan ku ahaa wada-noolanshaha bulshada.
Laamaha ammaanka ayaa xaqiijiyay in aaggaas la geeyay cutubyo gaar ah oo ka tirsan booliska, kuwaas oo ay ku jiraan Ciidanka Adeegga Guud (GSU) iyo Cutubka Gurmadka Degdegga ah (RDU), si ay u sugaan waddooyinka muhiimka ah sida waddada isku xirta Mwingi iyo Gaarisa, isla markaana ay galbin ammaan u sameeyaan gaadiidka shacabka iyo kuwa ganacsiga. Joogitaankan la xoojiyay ayaa ujeeddadiisu tahay in la xaqiijiyo isu-socodka, lana dejiyo dadka deegaanka xilli ay jirto cabsi amni.
Booliska ayaa xusay in kooxaha baarista iyo sirdoonka ay si firfircoon u daba-galayaan xogaha, si loo aqoonsado loona soo qabto dadkii falalkaas ka dambeeyay, iyagoo sheegay in ay ku dhow yihiin dadka looga shakisan yahay.
Taliska Booliska ayaa sidoo kale ugu baaqay dadka deegaanka in ay muujiyaan deggenaansho, ayna iska ilaaliyaan falal aargoosi ah oo xiisadda sii hurin kara, iyagoo odayaasha dhaqanka iyo culimada ugu baaqay in ay gacan ka geystaan nabadaynta.
Dhacdooyinkan ayaa iftiiminaya caqabadaha amni ee ka jira qaybo ka mid ah bariga Kenya, halkaas oo xukuumaddu ay dadaal ugu jirto dheellitirka hawlgallada ka dhanka ah dambiilayaasha iyo ka-hortagga in dhacdooyinka yaryar ay isku beddelaan isku-dhacyo beeleed oo baahsan.
