Spain ayaa qorsheyneysa inay Turkiga ka iibsato 15 diyaaradood oo dheeraad ah oo nooca Hurjet ah, kuwaas oo loo adeegsado tababarka duuliyeyaasha, kaddib markii ay heshiis ku iibsaneyso 30 diyaaradood la saxiixatay, sida uu sheegay Madaxa Fulinta ee Shirkadda Warshadaha Hawada Sare ee Turkiga (TAI), Mehmet Demiroglu.
Demiroglu oo ka hadlayay munaasabad lagu qabtay gobolka Kastamonu ee waqooyiga Turkiga ayaa sheegay in la filayo in diyaaradaha la gaarsiiyo Spain sannadka 2028.
“Xitaa ka hor inta aannaan bilaabin inaan diyaaradahan ku wareejinno ciidamadeenna cirka, Spain waxay tiri, ‘Waan ka helnay, waxaan dooneynaa inaan iibsanno 30 diyaaradood,’ wayna iibsatay. Heshiiskiina waan saxiixnay,” ayuu yiri.
“Waxaan ka shaqeyneynaa in diyaaradaha la gaarsiiyo sannadka 2028. Waxay sidoo kale qorsheynayaan inay iibsadaan 15 diyaaradood oo kale,” ayuu raaciyay.
Demiroglu ayaa sidoo kale ka hadlay awoodda wax-soo-saar ee shirkadda TAI, isagoo sheegay in xarunteedu ay isku keento hawlaha la xiriira diyaaradda dagaalka ee Kaan, diyaaradaha Hurjet iyo Hurkus, helikobtarrada, diyaaradaha aan duuliyaha lahayn, dayax-gacmeedyada iyo agabka diyaaradaha.
Wuxuu sheegay in xaruntu ay ka fuliso tijaabooyin iyo wax-soo-saar lix waaxood oo kala duwan, isagoo ku tilmaamay il lagu faano oo heer qaran ah.
Demiroglu ayaa sheegay in la bilaabay wareejinta diyaaradaha Hurkus, isla markaana ay sii socon doonto sannadaha soo socda. Wuxuu Azerbaijan ku tilmaamay mid ka mid ah dalalka loo dhoofiyo diyaaradahaas, isagoo sheegay in shirkaddu ay hiigsaneyso inay hesho heshiisyo dheeraad ah oo ay wax ugu iibineyso dalalka dibadda.
Demiroglu ayaa sheegay in warshadaha difaaca Turkiga ay xoojiyeen maqaamka caalamiga ah ee dalka, isla markaana ay sare u qaadeen xiisaha dunidu u qabto tiknoolajiyadda Turkiga.
“Sannadihii 2020-meeyadii, gaar ahaan guulaha laga gaaray warshadaha difaaca awgood, waxaa dunida oo dhan ka dhashay qaddarin aad u weyn oo loo hayo Turkiga,” ayuu yiri.
“Waxay la dhacsan yihiin wax-soo-saarkeenna, waxa aan qabanno iyo guulaha aan gaarnay,” ayuu raaciyay.
‘Waxaan u sameysaneynaa si aynaan ugu baahnaan inaan adeegsanno’
Demiroglu ayaa sheegay in ka hortagga khataraha iyadoo la muujinayo awood ciidan uu yahay mid ka mid ah ujeeddooyinka ugu waaweyn ee barnaamijyada difaaca Turkiga, oo ay ku jirto diyaaradda dagaalka ee Kaan.
“Ujeedkeenu ma ahan inaan dagaal qaadno. Waa inaan ka shaqeynaa sidii aan dagaal uga baaqsan lahayn,” ayuu yiri Demiroglu, isagoo carrabka ku adkeeyay baahida loo qabo in ciidamada qalabka sida ee Turkiga iyo dalka oo dhan loo diyaariyo khataraha amni.
“Ma dooneyno inaan adeegsanno diyaaradda Kaan,” ayuu raaciyay. “Waxaan u sameyneynaa si aynaan ugu baahnaan inaan adeegsanno.”
Demiroglu oo la hadlayay ardaydii ka qaybgashay munaasabadda ayaa ku dhiirrigeliyay jiilasha da'da yar inay horumariyaan xirfadahooda, isla markaana bartaan tiknoolajiyadaha u diyaarinaya mustaqbalka.
Wuxuu tilmaamay in ballaarinta bandhigyada duulista hawada iyo tiknoolajiyadda ee TEKNOFEST ay gacan ka geysatay kobcinta himilooyinka horumarinta tiknoolajiyadda.
