Safaaradda Jamhuuriyadda Federaalka Soomaaliya ee Jamhuuriyadda Shacabka Shiinaha ayaa magaalada Beijing ku qabatay Madasha Warshadaynta Soomaaliya iyo Aagagga Dhaqaalaha Gaarka ah, taas oo ay ka soo qayb galeen in ka badan 300 oo ganacsato Soomaaliyeed iyo Shiine ah, maalgashadeyaal, iyo wakiillo ka socday rugaha ganacsiga si ay u sahamiyaan fursadaha ganacsi, warshadeed, iyo maalgashi ee u dhexeeya labada dal.

Madashan oo lagu qabtay hal-ku-dhigga “Ka Faa’iidaysiga Siyaasadda Shiinaha ee Canshuur-dhaafka si loo Dardargeliyo Kobaca Warshadaha Soomaaliya ee Ku Saleysan Dhoofinta”, ayaa ku soo beegantay dabaal-degyada sanad-guurada 66-aad ee Xorriyadda iyo Midnimada Soomaaliya.

Khudbaddii furitaanka, Danjiraha Soomaaliya ee Shiinaha, Dr. Hodan Cismaan Cabdi, ayaa sheegtay in siyaasadda Shiinaha ee Canshuur-dhaafka ay abuurtay fursado cusub oo loogu talagalay dhoofinta badeecadaha Soomaaliya iyo horumarinta warshadaha dalka. Waxay tilmaantay in goobta istaraatiijiga ah ee Soomaaliya, kheyraadkeeda dabiiciga ah ee hodanka ah, iyo bulshada dhalinyarada badan ay yihiin tiirarka ugu muhiimsan ee kobaca dhaqaalaha iyo soo jiidashada maalgashiga.

Wasiirka Ganacsiga iyo Warshadaha, Jamaal Maxamed Xassan, ayaa soo bandhigay qorshaha Dowladda Federaalka ee warshadaynta dalka, isagoo ku dhiirrigeliyay shirkadaha Shiinaha inay maalgashi ku sameeyaan Soomaaliya, gaar ahaan qaybaha warshadaynta kalluunka, beeraha, xoolaha, iyo tamarta.

Agaasimaha Fulinta ee Xafiiska Horumarinta Maalgashiga Soomaaliya (SOMINVEST), Maxamed Dubo Maxamed, ayaa isaguna soo bandhigay fursadaha maalgashi ee Soomaaliya, dhiirrigelinta maalgashiga, iyo qaybaha mudnaanta u leh horumarinta warshadaha iyo dhaqaalaha.

Madasha waxaa sidoo kale lagu soo bandhigay mashaariicda waaweyn ee ku jira Qorshaha Isbeddelka Qaranka (National Transformation Plan – NTP), oo ay ka mid tahay Aagga Dhaqaalaha Gaarka ah ee Muqdisho Cusub (New Mogadishu Special Economic Zone). Mashruucan waxaa soo bandhigay Injineer Axmed Kirish, oo sharaxay qorshayaasha la xiriira dekedo casri ah, garoomo diyaaradeed, aagag warshadeed, iyo kaabeyaasha kale ee muhiimka ah.

Dhinacyada madasha waxaa lagu qabtay kulamo ganacsi oo toos ah (Business-to-Business – B2B), kuwaas oo u suurtageliyay shirkadaha Soomaaliyeed iyo kuwa Shiinaha inay sahamiyaan iskaashi iyo fursado maalgashi oo cusub.

Madashan ayaa qayb ka ah dadaallada joogtada ah ee Safaaradda Soomaaliya ee Shiinaha ay ku horumarinayso maalgashiga, ku xoojinayso iskaashiga dhaqaale, isla markaana ku ballaarinayso xiriirka ganacsi ee u dhexeeya Soomaaliya iyo Shiinaha. Waxay sidoo kale ku soo beegantay xilli siyaasadda Shiinaha ee Canshuur-dhaafka ee badeecadaha ka imanaya dalalka Afrika, oo Soomaaliya ay ku jirto, ay sii furayso suuqyo cusub oo dhoofin, isla markaana taageerayso ajandaha warshadaynta iyo isbeddelka dhaqaale ee Soomaaliya.