Turkiga ayaa soo saaray xeerar cusub oo ku saabsan baraha bulshada kuwaas oo loogu talagalay in lagu xoojiyo ilaalinta carruurta iyo isticmaaleyaasha da’yarta ah ee internetka.
Iyadoo ku biirtay dalal ay ka mid yihiin Australia iyo Faransiiska oo qaaday tallaabooyin la mid ah, xeerarku waxay diiradda saarayaan kor u qaadista badbaadada, kordhinta mas’uuliyadda madalaha iyo hubinta in si degdeg ah looga hortago waxyaabaha waxyeellada leh.
Sida ku cad xeerarka cusub, carruurta ka yar 15 sano ma awoodi doonaan inay iska diiwaangeliyaan baraha bulshada, iyadoo shirkadaha laga doonayo inay hirgeliyaan nidaamyo wax ku ool ah oo xaqiijinta da’da ah.
Bixiyeyaasha adeegyada waxaa sidoo kale laga doonayaa inay bixiyaan adeegyo kala duwan oo ku habboon da’da isticmaaleyaasha 15 sano iyo wixii ka weyn.
Habka fulinta
Xeerarku waxay soo kordhiyeen habab xakameyn oo waalidku isticmaali karo, taasoo u baahan agab lagu maamulo dejinta akoonnada lana xaddido waqtiga isticmaalkooda ee shaashadda.
Shirkadaha baraha bulshada waxaa waajib ku noqon doona inay qaadaan tallaabooyin ka hortagaya xayeysiinta khiyaanada ah isla markaana yareeya khataraha internetka.
Xaaladaha degdegga ah ee la xiriira amniga qaranka, madalaha waaweyn waa inay u hoggaansamaan amarada tirtiridda waxyaabaha ku jira hal saac gudaheed.
Waajibaadyo adag ayaa lagu dabaqi doonaa madalaha leh in ka badan 10 milyan oo isticmaale maalinle ah gudaha Turkiga.
Si looga hortago ku celcelinta xadgudubyada, madalaha waxaa laga doonayaa inay adeegsadaan sirdoonka macmalka ah si loo hubiyo in waxyaabihii sharci darrada ahaa ee hore loo tirtiray aan dib loo soo gelin.
Xeerarka ayaa lagu dhisay hab fulineed tallaabo-tallaabo ah.
Haddii waajibaadyada la fulin waayo, waxaa madashaas laga mamnuuci doonaa in lagu sameeyo xayeysiin cusub.
Haddii xadgudubyadu sii socdaan, hay’adaha ayaa dalban kara oggolaansho maxkamadeed si loo dhimo awoodda gudbinta ee madasha boqolkiiba 50, ugu dambeynna ilaa boqolkiiba 90.
Madalaha games-ka ayaa sidoo kale lagu daray, iyadoo xeerar mamnuucaya games-ka aan si sax ah loo qiimeyn da’da lagu dabaqay.
Madalaha games-ka ee ku saleysan dibadda ee leh in ka badan 100,000 isticmaaleyaal maalinle ah waxaa laga doonayaa inay magacaabaan wakiil sharci ah gudaha dalka.
Xeerarkan ayey ujeedadoodu tahay abuurista deegaan dijitaal ah oo ammaan badan oo hufan, iyadoo la filayo in ay dhaqan galaan 6 bilood kadib marka la daabaco.
