Shiinaha ayaa ku baaqay in Bariga Dhexe laga muujiyo is-xakameyn, isagoo ka digay fiditaanka dagaalka kadib weerar loo adeegsaday diyaaradaha aan duuliyaha lahayn oo Khamiistii lagu qaaday gobolka go’doonsan ee Nakhchivan ee Azerbaijan.

“Aad ayaan uga walaacsanahay xiisadaha sii kordhaya ee Bariga Dhexe. Waxa ugu muhiimsan xilligan waa in si degdeg ah loo joojiyo ficillada milatari, laga hortago in dagaalku ku fido ama u gudbo meelo kale, lana iska ilaaliyo sii kordhin kale,” ayay afhayeenka Wasaaradda Arrimaha Dibadda ee Shiinaha Mao Ning Jimcihii u sheegtay weriyeyaasha magaalada Beijing.

Mas’uuliyiinta Azerbaijan ayaa sheegay in weerarka ay ku dhaawacmeen afar qof isla markaana uu waxyeello gaarsiiyay kaabayaasha.

Hal diyaarad oo ah nooca aan duuliyaha lahayn ayaa ku dhacday dhismaha Garoonka Diyaaradaha Caalamiga ah ee Nakhchivan, halka mid kale ay ku dhacday meel u dhow iskuul ku yaalla tuulada Shakarabad.

Xiisadaha Bariga Dhexe ayaa sare u kacay iyadoo Israa’iil iyo Mareykanku ay sii wadaan duqeymahooda ballaaran ee ay maalintii toddobaad ku hayaan Iiraan.

Mas’uuliyiinta Iiraan ayaa sheegaya in ku dhowaad 1,000 qof lagu dilay weerarradaas, oo ay ku jiraan Hoggaamiyaha Sare Ali Khamenei, dhowr sarkaal milatari oo sare, iyo tobannaan gabdho iskuulo dhigta.

Iiraan ayaa ka jawaabtay weerarro gantaallo iyo diyaarado aan duuliye lahayn ah oo lagu beegsaday Israa’iil iyo dalalka Khaliijka ee martigeliya hantida milatari ee Mareykanka.

Shiinaha oo mar kale taageero u muujiyay Iiraan

Mao ayaa sidoo kale sheegtay in Shiinuhu “ka soo horjeedo weerarrada milatari ee Mareykanka iyo Israa’iil ku qaadeen Iiraan oo jebinaya sharciga caalamiga ah.”

Beijing “waxay taageertaa Iiraan ilaalinta madaxbannaanideeda, amnigeeda, dhammaystirka dhulkeeda, iyo karaamadeeda qaran, iyo difaaca xuquuqdeeda iyo danaha sharciyeysan,” ayay Mao tiri, iyadoo ka jawaabaysay su’aal ku saabsan nooca taageerada ay Shiinuhu siiyeen Iiraan, ha noqoto mid siyaasadeed ama mid kale.

Iyadoo laga hadlayo hanjabaadaha ku wajahan sahayda tamarta ee ka dhalan kara khilaafka gobolka, Mao waxay mar kale sheegtay in Marinka Hormuz iyo biyaha ku xeeran ay yihiin “marinno caalami ah oo muhiim u ah ganacsiga badeecadaha iyo tamarta.”

“Ilaalinta amniga iyo xasilloonida gobolkaas waxay u adeegtaa danaha guud ee bulshada caalamka,” ayay ku dartay.

“Shiinuhu wuxuu ugu baaqayaa dhammaan dhinacyada inay si degdeg ah u joojiyaan ficillada milatari, ka fogaadaan sii kordhinta xiisadaha, ka hortagaan qalalaase gobolka ka dhaca, isla markaana ka fogaadaan saameyn weyn oo ku timaadda horumarka dhaqaalaha caalamka,” ayay tiri Mao.

Iyadoo ka hadleysay xiisadaha u dhexeeya Mareykanka iyo Spain, waxay tiri: “Bulshada caalamka waa inay si wadajir ah uga shaqeeyaan horumarinta nabadda, joojinta dagaalka, iyo ilaalinta nabadda iyo xasilloonida Bariga Dhexe.”