Madaxa Hay’adda Caafimaadka Adduunka (WHO) ayaa Isniintii ku dhawaaqay in la ciribtiray safmarkii ugu dambeeyay ee cudurka Ebola ee Jamhuuriyadda Dimuqraadiga ee Kongo, isagoo ku tilmaamay “war farxad leh.”
Tedros Adhanom Ghebreyesus, oo warbaahinta kula hadlay Geneva, ayaa ugu hambalyeeyay dowladda iyo shacabka, gaar ahaan bulshada Bulape oo ay saameynta ugu weyni gaartay. Xanuunkan safmarka ah, oo la shaaciyay bishii Sebtembar, ayaa diiwaangeliyay 64 xaaladood oo la xaqiijiyay iyo kuwa la tuhunsan yahay, oo ay ku jiraan 45 qof oo u dhintay.
“Waxaan tacsi u diraynaa kuwii dhintay, gaar ahaan kuwii noloshooda ku waayay iyagoo dadka u adeegaya,” ayuu yiri Tedros.
Wuxuu sheegay in WHO ay “ku faanto doorkeeda” ee lagu xakameeyay xanuunka, iyagoo kaashanaya Wasaaradda Caafimaadka, hay’adaha qaranka iyo bahwadaag kale.
Tedros wuxuu xusay in toban sano ka hor aanay jirin talaal ama daawooyin la ogolaaday oo Ebola ah, halka maanta cudurka loo arko mid laga hortagi karo oo la daaweyn karo.
Si kastaba ha ahaatee, wuxuu ka digay in fayras kale oo halis ah uu hadda ku faafayo gobolka. “In kasta oo Ebola laga cirib tiray Jamhuuriyadda Dimoqraadiga ah ee Kongo, haddana waxaa labo toddobaad ka hor Itoobiya laga shaaciyay xanuunka safmarka ah ee Marburg,” ayuu yiri.
Ilaa hadda Itoobiya waxay soo werisay 12 xaaladood oo la xaqiijiyay, oo ay ku jiraan 8 dhimasho ah. Saddex bukaan ah ayaa ka bogsaday, mid kalena weli waxaa u socota daaweyn, sida ay sheegtay WHO. Tedros wuxuu sheegay in dowladda Itoobiya hoggaaminayso ololaha ka hortagga cudurka safmarka ah, WHO-na ay taageerayso marka loo baahdo.
WHO ayaa sidoo kale bixinaysa qalabka baaritaanka, agabkii ilaalinta shaqaalaha caafimaadka, waxayna diraysaa khubaro ka caawiya maamulka deegaanka sidii loo xakameyn lahaa xanuunka safmarka ah.
