Serikali ya Guinea ilitangaza Ijumaa kuwa nchi hiyo inataka kuandaa Kombe la Mataifa ya Afrika (AFCON), ikisema ina "ombi imara".

Taarifa ya serikali iliyotumwa kwa shirika la habari la AFP inasema Waziri Mkuu Amadou Oury Bah "ametia saini rasmi ombi la Guinea la kuandaa michuano ya AFCON ya 2032 na 2036".

Akizungumza siku ya Alhamisi, Bah alisema Guinea "sasa ina ombi thabiti, matokeo ya mchakato wa maandalizi na uchambuzi wa mahitaji mbalimbali yanayohusika katika kuandaa mashindano ya kiwango hiki".

Alisema maombi hayo yanaendana na maono ya Rais wa Jamhuri, Mamadi Doumbouya, "kuifanya Guinea kuwa nchi yenye uwezo wa kuandaa matukio makubwa ya kimataifa ya michezo".

Doumbouya alishinda uchaguzi mnamo Desemba 2025.

Haijawahi kuandaa AFCON

Guinea haijawahi kuandaa hatua ya fainali ya AFCON, na timu yake ya taifa haikushiriki katika michuano iliyopita.

Mafanikio makubwa zaidi ya Guinea yalikuwa mwaka 1976 walipomaliza katika nafasi ya pili nyuma ya Morocco kwenye kundi la fainali.

Michuano ya mwaka 2027 itaandaliwa kwa pamoja na nchi tatu za Afrika Mashariki - Kenya, Uganda na Tanzania - lakini wenyeji wa michuano inayofuata ya mwaka 2028 bado hawajatangazwa.

Kuanzia mwaka 2028 na kuendelea, AFCON itafanyika kila baada ya miaka minne badala ya miaka miwili, ili kuendana na ratiba ya mashindano mengine ya mabara.

Mali, Niger na Burkina Faso pia zimeonyesha nia ya kuandaa kwa pamoja AFCON ya mwaka 2032, kulingana na mashirikisho yao ya soka.