Nchi za Ghuba haziwezi kutegemea Marekani na muungano wa kimataifa pekee kwa ajili ya usalama wao, zinahitaji kujenga uwezo wa kujitegemea zaidi katika masuala ya usalama, msemaji wa Wizara ya Mambo ya Nje ya Qatar, Majid al-Ansari, amesema Jumatatu.

Amesema ushirikiano wa kimkakati na Marekani pamoja na uwepo wa majeshi ya kimataifa katika eneo la Ghuba bado ni muhimu, lakini haviwezi kuwa dhamana pekee ya usalama wa eneo hilo, hasa wakati kukiwa na mvutano na Iran.

“Tunapaswa kutambua katika Ghuba kwamba kuwa na majeshi ya kimataifa katika eneo hili na kuwa na ushirikiano wa kimkakati na Marekani ni jambo muhimu sana, lakini haitoshi,” alisema al-Ansari katika Kongamano la Hili mjini Abu Dhabi.

Ameongeza kuwa kujitegemea katika masuala ya usalama ndiyo njia pekee, akisisitiza kwamba nchi za Ghuba bado zinahitaji washirika na marafiki wao wa kimataifa, lakini haziwezi kuwategemea wao pekee.

Qatar pia imekuwa na nafasi muhimu katika juhudi za upatanishi kati ya Marekani na Iran, wakati mzozo huo ukiendelea kuvuruga usalama wa eneo na usafirishaji wa bidhaa kupitia baharini.

Mwezi uliopita, Waziri Mkuu wa Qatar, Sheikh Mohammed bin Abdulrahman Al Thani, alisafiri kwenda jijini Tehran, Iran ikiwa ni sehemu ya juhudi za upatanishi.

Iran na Oman, ambazo zote zinapakana na Mlango-Bahari wa Hormuz, pia zimejadili uwezekano wa kuanzisha kwa muda njia salama ya usafirishaji wa meli pamoja na hatua za kuondoa mabomu ya baharini, kufuatia kuvurugika kwa usafiri katika njia hiyo muhimu ya kimkakati.

Iran yazilenga nchi za Ghuba

Qatar ni mwenyeji wa kambi kubwa zaidi ya kijeshi ya Marekani katika Mashariki ya Kati, na yenyewe imekumbwa na mashambulizi kutoka Iran wakati wa mzozo huo, yakiwemo mashambulizi yaliyolenga miundombinu ya nishati.

Makombora na ndege zisizo na rubani za Iran pia zimezifikia moja kwa moja Saudi Arabia, Bahrain, Kuwait na Umoja wa Falme za Kiarabu (UAE).

Mashambulizi ya Iran dhidi ya vituo vya kijeshi, miundombinu ya nishati na maeneo ya kiraia katika eneo hilo yamesababisha mwitikio mkali kutoka kwa nchi za Ghuba.

Njia mbadala ya usalama wa kikanda

Uturuki, Saudi Arabia na Pakistan zilitia saini Mkataba wa Ulinzi wa Pamoja wa Makkah mwezi Agosti. Chini ya makubaliano hayo, shambulio la kijeshi dhidi ya nchi moja kati ya hizo tatu linapaswa kuchukuliwa kuwa ni shambulio dhidi ya nchi zote tatu.

Mkataba huo unalenga kuimarisha uwezo wa pamoja wa kuzuia mashambulizi pamoja na ushirikiano wa kiulinzi, huku ukiashiria mwelekeo mpana zaidi wa nchi za eneo hilo kujenga mifumo ya usalama inayomilikiwa na kuendeshwa zaidi ndani ya kanda.

Hatua hiyo inakuja wakati eneo hilo likitafuta njia mbadala za usalama badala ya kutegemea pekee dhamana za kiusalama kutoka kwa mataifa ya nje.