Bunge la Taifa la Nigeria siku ya Ijumaa limetangaza kusitisha safari zote rasmi za wabunge, kamati, maafisa na wafanyakazi wake kwenda Afrika Kusini, kufuatia kuendelea kwa vurugu dhidi ya wahamiaji nchini humo.
Afrika Kusini imekumbwa kwa miezi kadhaa na maandamano dhidi ya wageni, baadhi yake yakiwa ya vurugu na kusababisha vifo. Wiki iliyopita, maandamano mjini Durban yalifikia katika kambi iliyokuwa na raia wa Jamhuri ya Kidemokrasia ya Congo (DRC), na kusababisha mapigano makali.
Akin Rotimi, msemaji wa Baraza la Wawakilishi la Nigeria, amesema katika taarifa kwamba safari hizo zimesitishwa kuanzia sasa.
“Safari zote rasmi za kwenda Afrika Kusini zinazofanywa na Bunge la Taifa, kamati zake, wabunge, maafisa na wafanyakazi wake zimesitishwa.”
Rotimi alisema Bunge la Nigeria haliwezi kupuuza mashambulizi yanayoendelea dhidi ya raia wake walioko nje ya nchi. Ametaja ripoti zinazoonyesha kuwa baadhi ya Wanigeria wameuawa, kujeruhiwa, kulazimika kuhama au kuacha biashara zao kutokana na vurugu hizo.
Hatua hiyo pia inahusisha mikutano na shughuli rasmi zinazofanyika kwa njia ya mtandao.
Maandamano dhidi ya wahamiaji
Afrika Kusini, ikiwa ni miongoni mwa nchi zenye uchumi mkubwa na viwanda vilivyoendelea zaidi barani Afrika, kwa muda mrefu imekuwa kivutio kwa wahamiaji, wakiwemo wenye vibali halali na wale wasio na vibali.
Hata hivyo, nchi hiyo inakabiliwa pia na ukosefu mkubwa wa ajira, huduma dhaifu za kijamii na kiwango kikubwa cha uhalifu. Kwa mujibu wa wachambuzi, matatizo hayo yanazidi kulaumiwa kwa wahamiaji, licha ya kuwepo kwa changamoto za muda mrefu katika utendaji na sera za serikali.
Nigeria imekuwa miongoni mwa nchi zinazozungumza kwa nguvu zaidi kuhusu suala hilo, ikiishutumu Afrika Kusini kwa kutofanya vya kutosha kuzuia vurugu dhidi ya wahamiaji.
Katika baadhi ya matukio, waandamanaji wamekuwa wakienda nyumba kwa nyumba, kuwatoa watu kwa nguvu majumbani mwao na kuwakabidhi kwa magari ya polisi yaliyokuwa yakisubiri.
Hata wahamiaji wenye nyaraka halali za kukaa nchini humo wamejikuta wakikumbwa na vurugu hizo.
Mvutano uliongezeka kote nchini Afrika Kusini baada ya waandamanaji kuweka Juni 30 kuwa tarehe ya mwisho kwa wahamiaji wasio na vibali kuondoka nchini humo.
Kwa mujibu wa takwimu za AFP, zilizotokana na takwimu za serikali za nchi mbalimbali za Afrika zilizowarudisha raia wao nyumbani, zaidi ya watu 200,000 waliondoka Afrika Kusini.
Polisi wa Afrika Kusini wamesema takriban wahamiaji wanne waliuawa katika vurugu zinazohusiana na hali hiyo. Hata hivyo, baadhi ya serikali za kigeni zimesema idadi ya waliouawa ni kubwa zaidi.
