Akizungumza na waandishi wa habari katika Ikulu ya White House siku ya Alhamisi, Trump alijibu swali kuhusu uwezekano wa kutumia silaha ya nyuklia kwa kusema, “Hapana. Kwa nini nitumie silaha ya nyuklia wakati tayari tumewaangamiza kabisa bila kuitumia?”
Aliongeza kuwa, “Silaha za nyuklia hazipaswi kuruhusiwa kutumiwa na mtu yeyote.”
Hata hivyo, Trump alidokeza kuwa Iran huenda iliongeza silaha zake “kwa kiwango kidogo” wakati wa kipindi cha wiki mbili cha kusitisha mapigano, lakini akasisitiza kuwa Marekani inaweza kuziharibu kwa haraka.
“Jeshi lao la majini halipo tena. Jeshi lao la anga halipo, mifumo yao ya ulinzi wa anga pia imeharibiwa… huenda waliongeza kidogo wakati wa mapumziko ya wiki mbili, lakini tukigundua hilo tutaziharibu ndani ya siku moja,” alisema.
Trump pia alisisitiza kuwa anatafuta makubaliano ya kudumu badala ya suluhisho la muda mfupi. “Nataka kufikia makubaliano bora zaidi. Naweza kufanya makubaliano sasa hivi, lakini sitaki yawe ya muda—nataka yawe ya kudumu,” alisema.
Mnamo Aprili 7, Trump aliitishia Iran kwa kauli kali kwamba “historia ya Iran na ustaarabu mzima unaweza kuangamizwa usiku mmoja,” lakini ndani ya saa chache baadaye alikubali kusitisha mapigano—makubaliano ambayo yameendelea kuongezwa tangu wakati huo katika mzozo unaohusisha Marekani na Israel dhidi ya Iran.
