Botswana imetekeleza sheria mpya inayotaka makampuni ya madini kuuza asilimia 24 ya hisa katika makubaliano mapya kwa wawekezaji wa ndani ikiwa serikali itachagua kutonunua hisa hizo, wizara yake ya madini ilisema Ijumaa.

Sheria hiyo ilipendekezwa mwaka jana kama sehemu ya rasimu ya sheria, lakini serikali ilikuwa haijasema ni lini itaanza kutekelezwa.

Sheria ya Migodi na Madini hapo awali iliipa serikali ya Botswana haki ya kununua umiliki wa asilimia 15 katika mkataba wowote wa madini baada ya kupewa leseni, kukiwa na chaguo la hisa kubwa zaidi katika miradi ya almasi.

Nchi hiyo ya Kusini mwa Afrika ndiyo inayoongoza kwa uzalishaji wa almasi duniani kwa thamani na eneo linaloibukia la uchimbaji wa madini ya shaba.

Wizara ya Madini na Nishati ilisema katika taarifa yake kwamba sheria inayohitaji umiliki wa ndani wa asilimia 24 katika miradi ya uchimbaji madini ilianza kutumika Oktoba 1.

Pamoja na kuongeza umiliki wa ndani wa utajiri wa madini nchini, sheria hiyo inalenga kukuza shughuli za ndani za uongezaji thamani madini na kuhakikisha kampuni za uchimbaji madini zinaanzisha mifuko ya ukarabati wa mazingira.

Wakati marekebisho ya Sheria ya Migodi na Madini yakijadiliwa bungeni, waziri huyo wa zamani wa madini alisema wawekezaji wa ndani wanaweza kununua hisa za masharti nafuu kwa msaada wa mifuko ya pensheni ya ndani.