Rais wa Sudan Kusini, Salva Kiir, amemfuta kazi Mkuu wa Jeshi la nchi hiyo pamoja na Waziri wa Fedha ambaye alikuwa ametumikia nafasi hiyo chini ya wiki mbili, vyombo vya habari vya serikali nchini humo viliripoti usiku wa Jumatano.

Hatua hizo ni sehemu ya mabadiliko ya mara kwa mara katika safu za juu za serikali ya Salva Kiir katika miaka ya hivi karibuni.

Mkuu wa Jeshi aliyefutwa kazi, Jenerali Paul Nang, alikuwa ameshika nafasi hiyo tangu Oktoba 2025, na uongozi wake ulikuwa ukikosolewa zaidi kutokana na kuzorota kwa hali ya usalama nchini. Kwa upande wake, Waziri wa Fedha, Salvatore Garang Mabiordit, alikuwa ametumikia nafasi hiyo tangu Aprili 23 mwaka huu.

Deng Wol ateuliwa kwa mara ya pili

Salva Kiir amemteua tena Jenerali Santino Deng Wol kuwa mkuu mpya wa jeshi, shirika la habari la serikali la South Sudan Broadcasting Corporation lilisema. Wol, ambaye anatoka eneo la Bahr El Gazal ambako Kiir pia anatokea, ni mshirika wa karibu wa rais na aliwahi kushika nafasi hiyo kati ya mwaka 2020 na 2024.

Kuol Daniel Ayulo, mtaalamu wa muda mrefu serikalini ambaye aliwahi kufanya kazi katika wizara ya fedha na wizara ya biashara kama katibu mkuu msaidizi, ameteuliwa kuwa waziri mpya wa fedha, kwa mujibu wa vyombo vya habari vya serikali.

Sudan Kusini imekuwa ikikumbwa na changamoto katika kutekeleza kikamilifu mageuzi muhimu yaliyoainishwa katika makubaliano ya amani ya mwaka 2018 yaliyomaliza vita vya wenyewe kwa wenyewe vya miaka mitano, ikiwa ni pamoja na kuunganisha majeshi ya nchi na kuandaa uchaguzi.