Shirika la Fedha Duniani (IMF) limeidhinisha mpango mpya wa msaada wa kifedha kwa Liberia wenye thamani ya takriban Dola milioni 266, ambapo kiasi cha karibu Dola milioni 26.49 kitatolewa mara moja ili kusaidia mageuzi ya kiuchumi yanayoendelea nchini humo na juhudi za kuimarisha ustahimilivu wa uchumi.

Bodi ya Wakurugenzi wa IMF imeidhinisha mpango wa miezi 21 kupitia Mpango wa Fedha wa Kuimarisha Uhimilivu na Uendelevu wa Kiuchumi, sambamba na kukamilika kwa tathmini ya tatu ya mpango uliopo wa Mpango wa Mikopo ya Muda Mrefu kwa Liberia.

Mpango mpana wa mageuzi wa Liberia unalenga kurejesha uthabiti wa uchumi mkuu, deni la taifa, kuimarisha mifumo ya kifedha, na kuboresha utawala bora, Shirika hilo la Fedha limesema.

Takwimu za hivi karibuni za kiuchumi zinaonesha kuwa ukuaji wa uchumi umeongezeka hadi asilimia 5.1 mwaka 2025, ukiendeshwa zaidi na kuongezeka kwa shughuli za uchimbaji madini, huku mazingira ya kisiasa yakibaki kuunga mkono mageuzi chini ya ajenda ya serikali ya Maendeleo Jumuishi inayofahamika kama ‘ARREST Agenda’.

Mpango wa Mikopo ya Muda Mrefu

Baada ya uamuzi wa Bodi, Naibu Mkurugenzi Mkuu wa IMF, Bo Li, alisema: “Viongozi wa nchi wameendelea kudumisha sera bora za uchumi mkuu na wamepiga hatua fulani katika mageuzi ya kimuundo chini ya mpango wa Mpango wa Mikopo ya Muda Mrefu (ECF).”

“Utendaji wa kiuchumi umekuwa imara. Hata hivyo, hali mbaya ya uchumi wa dunia imeongeza hatari za kushuka kwa uchumi, hasa kutokana na kupanda kwa bei ya mafuta na kupungua kwa misaada baina ya nchi.”

Alieleza kuwa marekebisho ya bajeti yamesaidia kupunguza hatari za madeni, huku mageuzi ya matumizi yakiruhusu serikali kuelekeza rasilimali zaidi kwenye miradi muhimu ya uwekezaji na programu muhimu za kijamii. Hata hivyo, alisisitiza kuwa bado kuna haja ya kufanya marekebisho zaidi.

“Ili kupunguza athari za bei kubwa ya mafuta, serikali imeanzisha ruzuku za muda na zinazolengwa kusaidia usafiri wa umma. Bajeti ya nyongeza iliyopitishwa hivi karibuni itawezesha ongezeko la matumizi ya kijamii huku ikilinda nidhamu ya kifedha,” Li alisema.

Mageuzi ya kodi

IMF pia imeeleza mipango ya Liberia ya kuimarisha mapato ya ndani kupitia kuanzishwa kwa kodi ya ongezeko la thamani (VAT) mwaka 2027, mageuzi katika kodi za sekta ya madini, na kupunguza misamaha ya kodi. Hatua hizi zinatarajiwa kusaidia kufadhili vipaumbele vya kitaifa chini ya ajenda ya Kilimo, Barabara, Utawala wa Sheria, Elimu, Usafi wa Mazingira na Utalii (ARREST).

Kuhusu sera ya fedha, Benki Kuu ya Liberia inatarajiwa kuendelea kuwa makini kutokana na shinikizo la uchumi wa dunia, hasa ongezeko la bei ya mafuta, huku ikiendelea kuimarisha sekta ya benki. Hii inajumuisha kusimamia mipango ya marekebisho na kupunguza mikopo chechefu ili kuongeza uwezo wa sekta binafsi kukopa.

Li aliongeza kuwa kuimarisha hatua za kupambana na rushwa kutakuwa muhimu katika kuongeza uwazi na uwajibikaji.

Mpango mpya ulioidhinishwa wa Kuimarisha Uhimilivu na Uendelevu wa Kiuchumi pia unatarajiwa kusaidia juhudi za Liberia za kukabiliana na mabadiliko ya tabianchi na kuboresha maandalizi dhidi ya milipuko ya magonjwa ya siku za usoni, sambamba na kusaidia kuvutia fedha za kimataifa zaidi na kupunguza hatari za urari wa malipo.