Jamhuri ya Kidemokrasia ya Congo (DRC) imesema kuwa Shirikisho la Soka la nchi hiyo (FECOFA), kwa kushirikiana na FIFA, limethibitisha kuwa timu ya taifa itakayoshiriki Kombe la Dunia inakidhi masharti ya Marekani yanayohusiana na mlipuko wa Ebola. Hatua hiyo imefungua njia kwa timu hiyo kushiriki mashindano hayo bila vikwazo.

Afisa mmoja wa timu alisema siku ya Jumamosi kuwa maandalizi yanaendelea kama ilivyopangwa, licha ya sharti la Marekani linalotaka wasafiri wawe wamemaliza kipindi cha siku 21 za kujitenga kabla ya kuingia nchini humo.

Mamlaka nchini DRC zimeeleza kuwa idadi kubwa ya wachezaji wa kikosi hicho wanaishi barani Ulaya, jambo linalopunguza hatari ya kuathiriwa moja kwa moja na mlipuko huo.

Marekani ni mmoja wa wenyeji wa Kombe la Dunia litakalofanyika kuanzia Juni 11 hadi Julai 19, kwa ushirikiano na Canada na Mexico.

Wiki iliyopita, Shirika la Afya Duniani (WHO) lilionya kuhusu hatari “kubwa” ya aina ya Ebola ya Bundibugyo kuenea nchini DRC, ambapo zaidi ya maambukizi 1,000 na vifo 246 vinavyoshukiwa vimetokana na Ebola vimeripotiwa hadi sasa.

Taratibu za usalama

Mamlaka nchini DRC zilisema kuwa shirikisho lao la soka (FECOFA) lilifanya mazungumzo na FIFA wiki hii na kwamba timu hiyo sasa inazingatia kikamilifu taratibu za afya na usalama, ikiwemo kughairi kambi ya mazoezi mjini Kinshasa na kuhamishia maandalizi nje ya nchi.

“Ninapongeza FECOFA na FIFA kwa kuchukua hatua za haraka na za maamuzi ya kuwajibika na wenye mantiki,” alisema Balozi wa DRC nchini Marekani, Yvette Kapinga Ngandu, katika taarifa iliyotolewa Jumatano.

“Leopards wako tayari, wako salama, na sina shaka kwamba Marekani itaikaribisha timu hii.”

Wengi wa wachezaji wa kikosi hicho wanaishi Ulaya, jambo linalopunguza hatari ya kuambukizwa moja kwa moja, huku baadhi ya walioondoka Kinshasa mapema mwezi huu wakitarajiwa kukamilisha angalau siku 21 barani Ulaya kabla ya kusafiri kwenda Marekani kwa mujibu wa mwongozo wa afya wa Marekani.

‘Tuko tayari kupambana’

“Serikali ya Jamhuri ya Kidemokrasia ya Congo imefanya kila lililo ndani ya uwezo wake kuhakikisha wanafika Marekani wakiwa wamejiandaa, wamelindwa, na wako tayari kupambana,” alisema Waziri wa Michezo Didier Budimbu.

Maafisa pia walieleza wasiwasi kuhusu mashabiki waliopata tiketi za Kombe la Dunia lakini hawajaweza kupata visa za Marekani kutokana na vikwazo vya nchi hiyo, wakiongeza kuwa mazungumzo yanaendelea na FIFA kuhusu uwezekano wa kurejeshewa fedha zao.

Timu ya Congo, inayoshiriki Kombe la Dunia kwa mara ya kwanza baada ya miaka 52, inatarajiwa kuweka makazi yake Houston. Itaanza kampeni yake ya Kundi K dhidi ya Ureno mnamo Juni 17, kabla ya kucheza na Colombia mjini Guadalajara Juni 23 na Uzbekistan mjini Atlanta Juni 27.