Rais wa Marekani, Donald Trump, amesema mazungumzo kuhusu kuiondolea Iran uwezo wa kutengeneza silaha za nyuklia yanaendelea vizuri huku mazungumzo yakifanyika nchini Qatar.

Akizungumza na waandishi wa habari Jumatano kabla ya kuondoka kuelekea North Dakota, Trump alisema wajumbe wake, Steve Witkoff na Jared Kushner, wamekuwa na mikutano yenye mafanikio jijini Doha.

"Wamekuwa na mikutano mizuri sana," alisema Trump, akiongeza kuwa Iran imeonyesha maendeleo makubwa na kupunguza wasiwasi kuhusu uwezekano wa kurejea kwa vita.

Kauli zake zimekuja baada ya ripoti ya gazeti la The Wall Street Journal kudai kuwa hivi karibuni alijadiliana na washauri wake wakuu wa kijeshi, akiwemo Waziri wa Ulinzi Pete Hegseth, kuhusu uwezekano wa kurejea kwa vita. Hata hivyo, Trump ameripotiwa kuamua kutoa kipaumbele kwa njia ya diplomasia kwa sasa.

Rais huyo alisema ingawa jeshi la Marekani "liliwashambulia kwa nguvu kubwa wiki iliyopita," anaamini mchakato wa kidiplomasia unaendelea kuleta matokeo chanya. "Tunaelewana vizuri sana," alisema.

Kwa mujibu wa ripoti ya Bloomberg iliyochapishwa Jumatano, mazungumzo ya kiufundi yanayoendelea Qatar yanaonyesha kupiga kwa hatua huku Marekani na Tehran zikijaribu kufikia suluhisho la kudumu la vita vilivyoendelea kwa miezi kadhaa.

Licha ya kauli za matumaini kutoka Ikulu ya White House, serikali ya Iran imekanusha rasmi kuwa kuna mikutano yoyote ya moja kwa moja iliyopangwa kati yake na wawakilishi wa Marekani, ikisisitiza kuwa mawasiliano yote yanafanyika kupitia wapatanishi.

Makubaliano ya awali kati ya Marekani na Iran, yaliyofanikishwa na Pakistan, yalianza kutekelezwa baada ya kutiwa saini kwa njia ya kielektroniki na Rais wa Iran, Masoud Pezeshkian, pamoja na Rais wa Marekani, Donald Trump.

Makubaliano hayo yanaweka mfumo wa kumaliza vita vilivyoanza mwishoni mwa Februari na kushughulikia masuala yaliyobaki kati ya Marekani na Iran kupitia mazungumzo.

Miongoni mwa masuala hayo ni kusitishwa kwa mapigano katika maeneo yote, ikiwemo Lebanon, kuondolewa kwa baadhi ya vikwazo vya kiuchumi, suala la mpango wa nyuklia wa Iran, kufunguliwa kikamilifu kwa Mlango-Bahari wa Hormuz, pamoja na mipango mipana ya usalama wa kikanda.