Kiongozi Mkuu wa Iran, Mojtaba Khamenei, amesema Marekani hatimaye italazimika kuondoka Mashariki ya Kati baada ya kupata kile alichokiita “pigo kubwa”.
Khamenei alitoa kauli hiyo Jumatatu katika taarifa iliyotolewa na televisheni ya taifa ya Iran.
“Leo, baada ya kupata kipigo kikali kutoka kwa wapiganaji jasiri na walinzi wa Mlango-Bahari wa Hormuz, wao (maadui) hawathubutu kuvuka Bahari ya Arabia,” Khamenei alisema, bila kuitaja Marekani moja kwa moja.
Aliongeza: “Kila walipothubutu kuchukua hatua hiyo, wamejiletea madhara wenyewe. Haitachukua muda mrefu kabla Bahari ya Arabia nayo kuwaondoa katika eneo hilo.”
Kauli hizo zilitolewa wakati juhudi zikiendelea za kufufua mazungumzo yanayolenga kumaliza mapigano kati ya Iran na Marekani.
Bahari ya Arabia ni njia muhimu ya usafirishaji wa baharini inayotandaa kutoka Rasi ya Arabia kuelekea India, na inayotoa ufikiaji wa pwani ya Iran pamoja na Mlango wa Hormuz.
Iran na Marekani zimekuwa zikipigania udhibiti wa njia hiyo muhimu ya majini tangu vita vilipoanza kwa mashambulizi ya Marekani na Israel dhidi ya Iran mwezi Februari.
Kabla ya mzozo huo, Mlango wa Hormuz ulikuwa ukipitisha takribani asilimia 20 ya usambazaji wa mafuta na gesi duniani.
Baada ya vita kuanza, Iran iliweka kizuizi cha usafirishaji katika Mlango wa Hormuz, hatua iliyosababisha Marekani kujibu kwa kuweka kizuizi dhidi ya bandari za Iran.
