Ndege ya raia iliyokuwa na abiria ilianguka karibu na mji wa mashariki mwa Ufaransa wa Tomblaine, na kuua watu wote 11 waliokuwemo, mamlaka za eneo zilisema, katika moja ya ajali mbaya zaidi ya ndege ndogo nchini Ufaransa.

Ajali hiyo ya Jumapili iliua wakufunzi watano, wanafunzi watano, na rubani, alisema Yves Seguy, mkuu wa idara ya mashariki ya Meurthe-et-Moselle.

"Hakukuwa na watu wa kando walioathiriwa," aliongeza, akizungumza katika mkutano na waandishi wa habari.

Ndege hiyo iliyosajiliwa nchini Ujerumani, ilianguka katika eneo lenye nyasi karibu na barabara ya ndege ya Nancy-Essey, karibu na eneo la makazi na barabara mbili.

Chanzo cha tukio hilo hakijafahamika mara moja.

Timu za msaada wa kimatibabu na kisaikolojia zilikuwa zikiwahudumia jamaa za waathiriwa waliokuwepo kwenye uwanja wa ndege, pamoja na mashahidi wengine.

‘‘Uchunguzi wa kiufundi umefunguliwa,’’ alisema Amaury Lacote, naibu mwendesha mashtaka wa umma katika mji wa mashariki wa Nancy.

Polisi waliwataka watu kwenye mtandao wa kijamii wa X "kuepuka kabisa" eneo karibu na uwanja wa ndege ili kuruhusu huduma za dharura kufikia.

Waziri wa Mambo ya Ndani wa Ufaransa Laurent Nunez anatarajiwa kuzuru eneo la ajali majira ya alasiri, kwa mujibu wa wafanyakazi wake.