Iran imeongeza vitisho vyake dhidi ya nchi jirani za Ghuba baada ya kuonya kuwa itashambulia miundombinu ya umeme katika eneo hilo ikiwa Marekani itafanya mashambulizi dhidi ya mitambo yake ya kuzalisha umeme, kwa mujibu wa ripoti ya Shirika la Habari la AFP.

Maafisa wawili waliolizungumza suala hilo na AFP wamesema Iran ilituma ujumbe kupitia wapatanishi, ikieleza kuwa shambulio lolote la Marekani dhidi ya mitambo yake ya umeme lingejibiwa kwa mashambulizi dhidi ya miundombinu ya aina hiyo katika nchi za Ghuba.

Aidha, Iran ilidaiwa kutaja maeneo maalumu ambayo yangeweza kuwa shabaha ya mashambulizi hayo.

Onyo hilo lilitolewa kufuatia kauli za Rais wa Marekani, Donald Trump, ambaye alitishia kuanzisha mashambulizi makubwa dhidi ya Iran. Hata hivyo, mwishoni mwa wiki, Trump alionekana kulegeza msimamo wake akisema amepokea maombi kutoka Saudi Arabia, Falme za Kiarabu (UAE) na Qatar, huku pia akieleza matumaini ya kupatikana kwa mafanikio katika mazungumzo.

"Iran ilitishia kulenga miundombinu ya umeme ya nchi za Ghuba, moja baada ya nyingine, iwapo Trump angeshambulia mitambo yake ya umeme," alisema mmoja wa maafisa wa eneo la Ghuba aliyenukuliwa na AFP.

Afisa mwingine wa kikanda pia alithibitisha kuwa ujumbe huo ulitumwa.