Nigeria imewaua zaidi ya "magaidi" 13,000 katika mwaka uliopita, Rais Bola Tinubu alisema Ijumaa, akiongeza kuwa idadi ya vifo kutokana na mashambulizi ya kigaidi nchini humo imepungua kwa asilimia 81 tangu aingie madarakani mwaka 2023.

Nchi yenye watu wengi zaidi barani Afrika inapambana na kampeni ya muda mrefu ya ugaidi katika maeneo yake ya kaskazini.

Rais Bola Tinubu, anayetarajiwa kuchaguliwa tena Januari, alitangaza hali ya dharura ya usalama nchini kote Novemba mwaka jana katika juhudi za kukabiliana na wimbi la utekaji nyara mkubwa na ghasia.

Tinubu, akizungumza wakati wa hotuba ya televisheni kuadhimisha siku ya demokrasia nchini humo, alisema: "Zaidi ya magaidi 13,000 wameangamizwa katika mwaka uliopita".

Hakutaja kama alimaanisha mwaka 2025 au katika miezi 12 iliyopita.

'Waweka chini silaha'

Rais pia alisema kuwa zaidi ya "wapiganaji 124,000 na wategemezi wameweka silaha zao chini tangu 2023 kupitia Operesheni Safe Corridor".

Muhula wa kwanza wa Tinubu madarakani pia umesimamia kutumwa kwa wanajeshi wa Marekani nchini humo.

Mashambulizi ya kigaidi yameua makumi ya maelfu na mamilioni ya wengine kuyahama makazi yao tangu 2009.

Katika mojawapo ya majaribio ya hivi punde ya kukabiliana na mzozo wa usalama, serikali ilizindua harakati za kuajiri askari polisi 50,000 na mwaka huu imetenga bajeti ya naira trilioni 5.41 (dola bilioni 4) kwa jeshi - ambayo Tinubu alisema ilikuwa kubwa zaidi kwa ulinzi katika historia ya nchi.

Ushirikiano wa kijeshi na Marekani, Ufaransa, na "nchi nyingine za Ulaya" ambazo hakuzitaja, zimeendelea kutoka mafunzo hadi "kulenga kwa usahihi" na kusababisha uharibifu wa kituo cha amri cha kundi la kigaidi la Boko Haram kaskazini mashariki mwa jimbo la Borno.

Kamandi ya Marekani barani Afrika wiki hii ilisema operesheni zake za pamoja na Nigeria zimeua zaidi ya magaidi 200 wanaohusishwa na Daesh.