Rais wa Burundi Evariste Ndayishimiye amemfuta kazi waziri wake wa miundombinu siku ya Jumanne baada ya kuwepo ofisini kwa chini ya miezi mitatu tu, kulingana na agizo la Rais.

Egide Nijimbere aliteuliwa kuwa waziri mpya wa miundombinu, makazi na uchukuzi, kuchukua nafasi ya Damien Niyonkuru, ambaye alikuwa ameteuliwa mwezi Januari.

Nijimbere amehudumu katika wizara hiyo kwa miaka mitano kama katibu mkuu.

Ingawa sababu za kumuondoa Niyonkuru hazikutolewa licha ya kuwa kwenye wadhifa huo kwa muda mfupi, uamuzi huo umekuja huku kukiwa na malalamiko kuhusu kucheleweshwa kwa ujenzi wa barabara na uhaba wa mafuta.

Burundi, ambayo inategemea kuagiza mafuta na bidhaa za petroli kutoka nje, imekuwa ikikabiliwa na uhaba wa mafuta kwa miezi kadhaa, kusababisha foleni ndefu jambo lililofanya serikali ilaumiwe.

Kuongezeka kwa bei ya mafuta duniani hivi karibuni kutokana na mapigano Mashariki ya Kati kumesababisha hali kuwa mbaya zaidi.

Mawaziri wengine wapya waliteuliwa katika mabadiliko hayo madogo. Fidele Nkezabahizi aliteuliwa kuwa waziri wa afya, huku Evelyne Butoyi akiwa waziri wa mawasiliano.

Wizara ya mawasiliano ilikuwa haina waziri kufuatia kifo cha Gabby Bugaga aliyepatikana amefariki katika gari lililokuwa limeharibiwa mapema mwezi huu karibu na mji mkuu wa kibiashara wa Bujumbura.