Raundi ya kwanza ya mazungumzo kati ya Hamas na wapatanishi kuhusu kusitisha mapigano Gaza imekamilika nchini Misri "katika mazingira chanya", vyombo vya habari vinavyohusiana na serikali ya Misri vimeripoti.
Al-Qahera News ilisema mazungumzo hayo yalifanyika katika mji wa mapumziko wa Sharm el-Sheikh ulioko kwenye Bahari Nyekundu na yataendelea baadaye siku hiyo.
Ujumbe wa Israeli pia uliwasili mjini humo Jumatatu kwa mazungumzo yasiyo ya moja kwa moja.
Mazungumzo hayo yanazingatia pendekezo la Rais wa Marekani Donald Trump kuhusu kusitisha mapigano kwa muda mrefu na kubadilishana wafungwa na mateka kati ya Israeli na Hamas.
‘Mazingira chanya’
Vyanzo vilivyonukuliwa na vyombo vya habari vya Misri vimesema mikutano kati ya wapatanishi na Hamas ilikuwa ya kujenga na ilisaidia kuweka ramani ya njia kwa ajili ya duru ya sasa ya mazungumzo.
Wawakilishi wa Hamas waliripotiwa kuwaambia wapatanishi kwamba mashambulizi ya mara kwa mara ya Israeli huko Gaza yanatoa changamoto kubwa kwa maendeleo ya mpango wa kubadilishana wafungwa.
Mazungumzo yasiyo ya moja kwa moja kati ya Hamas na Israeli yalianza Jumatatu jioni, yakisimamiwa na Misri, Qatar, na Marekani.
Mazungumzo hayo yanakusudia kuandaa mazingira ya kutekeleza mpango wa Trump, ambao ulitangazwa wiki iliyopita.
Trump anasema ‘maendeleo makubwa’
Akizungumza Ikulu ya Marekani Jumatatu usiku, Trump alisema anaamini "maendeleo makubwa" yamepatikana kuelekea kufikia makubaliano kuhusu Gaza.
"Nadhani mambo yanaenda vizuri sana kuhusu mpango wa Gaza," aliwaambia waandishi wa habari, akiongeza kuwa Hamas imekuwa "ikifanya vizuri sana" na imekubali "mambo muhimu."
Alielezea mpango huo kama "mpango wa kushangaza ambao kila mtu anakubaliana nao," akisema kwamba pande zote zinafanya kazi kuelekea kukamilisha mpango huo.
Trump alisema Waziri Mkuu wa Israeli Benjamin Netanyahu alikuwa "na mtazamo chanya" kuhusu pendekezo hilo na kwamba pia alikuwa amezungumza na Rais wa Uturuki Recep Tayyip Erdogan, ambaye alikuwa "akisukuma kwa nguvu mpango wa Gaza."
