Shirikisho la Soka la Mali limesema katika taarifa yake kwamba maafisa wa mashirikisho ya soka ya Mali, Niger na Burkina Faso wamekutana na Rais wa Shirikisho la Soka la Afrika (CAF), Patrice Motsepe, Jumamosi mjini New York, Marekani, kwa lengo la kuwasilisha ombi la pamoja la kuandaa AFCON 2032.

Shirikisho hilo la Mali limeeleza kuwa mkutano huo na CAF ni “hatua muhimu katika mchakato wa zabuni”, kwani umeyawezesha mashirikisho hayo matatu kuendelea na taratibu zilizoainishwa katika kanuni za CAF kuhusu uteuzi wa mwenyeji wa AFCON 2032.

Taarifa hiyo iliongeza kuwa mashirikisho hayo matatu yataendelea na “kazi inayohitajika kuandaa ombi imara na lenye kuaminika, linaloonyesha mtazamo mpya kwa soka la Afrika.”

Burkina Faso na Mali zimeshawahi kuandaa AFCON

Burkina Faso iliandaa michuano ya AFCON mwaka 1998, huku Mali ikiwa mwenyeji mwaka 2002. Niger, kwa upande wake, haijawahi kuandaa mashindano hayo yanayofanyika kila baada ya miaka miwili.

Mali ina viwanja vitano vilivyoidhinishwa na CAF, wakati Burkina Faso ilipata idhini mwaka 2025 kwa uwanja mkuu uliopo mjini Ouagadougou.

Niger, wakati huo huo, inaendelea na maboresho ya Uwanja wa General Seyni Kountche, ambao umekuwa ukizuiwa kuandaa mechi za kimataifa tangu mwaka 2022 kutokana na kutokidhi viwango vinavyohitajika.

AFCON ijayo itaandaliwa kwa pamoja na Kenya, Tanzania na Uganda kuanzia Juni 19 hadi Julai 17, 2027.