Sehemu kuu ya njia ya kutua na kupaa kwa ndege katika Uwanja wa Ndege wa Kimataifa wa Cape Town, Afrika Kusini, imefungwa kwa muda baada ya ndege ya Kenya Airways kupata hitilafu kwenye matairi yake wakati wa kutua, mamlaka ya viwanja vya ndege nchini Afrika Kusini imesema leo jioni.

Kampuni ya Viwanja vya Ndege Afrika Kusini imesema katika taarifa yake kuwa ndege hiyo imeshindwa kuondolewa kwenye eneo la kutua na kupaa, hivyo kusababisha njia hiyo kutotumika kwa muda.

Kutokana na hali hiyo, ndege zote zinazotarajiwa kuwasili katika uwanja huo zimeelekezwa kwenye viwanja vingine vya ndege.

Wakati huo huo, safari za ndege za ndani zinazoondoka zinaendelea, lakini safari za ndege za kimataifa zinazoondoka zimesitishwa kwa sasa.