Idadi ya watu wanaokimbia Ethiopia kuingia nchi jirani ya Kenya imeongezeka hadi 36,000, Umoja wa Mataifa umesema siku ya Jumanne, huku mapigano karibu na mji wa mpakani wa Moyale yakiendelea kusababisha raia kuondoka katika makazi yao, wengi wakiwa wanawake na watoto.
Shirika la Msalaba Mwekundu la Kenya linasema wale walioondolewa katika makazi yao wanapata hifadhi kwenye kambi sita na vijiji vya maeneo hayo.
“Vyakula zaidi vinapelekwa kwenye makambi na watu wanaojitolea wanasaidia kuleta milo kila siku, pamoja na huduma za afya na bidhaa zingine,” Msalaba Mwekundu ilisema katika taarifa.
Mapigano upande wa mpaka wa Ethiopia yanatokana na mzozo kuhusu maeneo ya kiusimamizi ya jamii ya Oromia na Somali, na kuzidishwa kwa kuuawa kwa binti mmoja mwenye umri wa miaka 13 katika eneo la kanda ya Somali nchini Ethiopia.
Kenya inahofia kuwepo kwa idadi kubwa ya wakimbizi
Shirika la Umoja wa Mataifa linaloshughulikia wakimbizi linasema liko “eneo la tukio” pamoja na mashirika mengine ya misaada “kuunga mkono juhudi za dharura za eneo hilo na taifa”.
Viongozi wa Kaunti ya Marsabit nchini Kenya wameeleza wasiwasi wao kuwa kuna maelfu ya watu waliowapa makazi wakimbizi na wakatoa wito wa kupatikana msaada zaidi.
Tume ya Kutetea Haki za Binadamu ya Kenya siku ya Jumanne ilitoa wito wa kupatikana kwa misaada ya haraka kulinda wale walioondolewa kwenye makazi yao na kuwapunguzia adha jamii ya eneo hilo.
