China yasema kizuizi cha Marekani katika Mlango-Bahari wa Hormuz ni 'hatari'

China imetaja kizuizi cha Marekani katika Mlango-Bahari wa Hormuz "ni hatari na isiyo na uwajibikaji."

Kwa mujibu wa msemaji wa Wizara ya Mambo ya Nje ya China, Guo Jiakun, kizuizi hicho kilichowekwa na Marekani kitaongeza tu mvutano, kudhoofisha zaidi makubaliano ya usitishaji vita ambao tayari ni dhaifu, na kuongeza hatari kwa usalama wa usafiri katika Mlango wa Hormuz. Alisema hayo siku ya Jumanne wakati wa mkutano na waandishi wa habari mjini Beijing, kulingana na China News Service.

Guo alisema Beijing inaamini kuwa ni “usitishaji vita wa kina na unaojumuisha” pekee unaoweza kuunda mazingira ya msingi ya kupunguza mvutano katika mlango huo.

Alihimiza pande zote kuheshimu makubaliano ya usitishaji vita, kuzingatia mazungumzo na majadiliano, na kuchukua hatua za vitendo kupunguza mvutano na kurejesha “urambazaji wa kawaida” katika mlango huo haraka iwezekanavyo.

Guo pia alisema China imekuwa ikichukua kwa muda mrefu “mtazamo wa tahadhari na uwajibikaji” kuhusu mauzo ya kijeshi, na inatekeleza udhibiti mkali kulingana na sheria zake za udhibiti wa usafirishaji nje na wajibu wake wa kimataifa, alipoulizwa kuhusu ripoti kwamba China ilitoa msaada wa kijeshi kwa Iran.

Aliita ripoti hizo kuwa “za uwongo,” akisema: “Ikiwa Marekani itasisitiza kutumia hili kama kisingizio cha kuweka ushuru wa ziada kwa China, China itachukua hatua za kujibu kwa uthabiti.”

Vitisho vya ushuru wa ziada

Wakati huohuo, Rais wa Marekani Donald Trump, ambaye anatarajiwa kutembelea Beijing mwezi ujao kwa mazungumzo na mwenzake Xi Jinping, alisema siku ya Jumapili kwamba ataweka ushuru wa asilimia 50 kwa bidhaa za China iwapo itatoa msaada wa kijeshi kwa Iran.

Kauli yake ilikuja siku hiyo hiyo ambapo chombo cha habari cha Marekani CNN kiliripoti kuwa ujasusi wa Marekani ulionyesha China ilikuwa ikijiandaa kupeleka mifumo mipya ya ulinzi wa anga kwa Iran ndani ya wiki chache zijazo, ikinukuu watu watatu wanaofahamu tathmini hizo.

Mwishoni mwa wiki, gazeti la The New York Times lilinukuu maafisa wa Marekani wakisema kuwa ujasusi wa Marekani ulidokeza kwamba China huenda tayari ilikuwa imetuma shehena ya makombora yanayobebwa begani.

China ni mshirika muhimu wa kiuchumi wa Iran — inanunua sehemu kubwa ya mafuta ya nchi hiyo ya Mashariki ya Kati.

Hata hivyo, nchi hizo hazina makubaliano rasmi ya kijeshi, na wachambuzi wengi wanasema China kwa kiasi kikubwa huona uhusiano kati yao kama wa kibiashara tu.

China pia ina uhusiano imara wa kiuchumi na nchi za Ghuba, na imekosoa mashambulizi ya Iran dhidi yao katika kipindi cha vita.