Jeshi la Iran limebadilisha msimamo wake wa kijeshi kutoka ule wa "kujihami hadi wa kushambulia," msemaji wa jeshi alisema Jumamosi, akirejelea mafunzo yaliyotokana na vita vya hivi karibuni vya nchi hiyo.

Brigedia Jenerali Mohammad Akraminia aliambia shirika la habari la serikali, IRNA, kuwa mabadiliko hayo yalitokea hatua kwa hatua wakati wa kile alichokitaja kuwa vita vya siku 12 na siku 40.

"Msimamo wa kijeshi wa nchi yetu hapo awali ulikuwa wa kujihami, lakini hatua kwa hatua wakati wa vita hivi viwili, tulishuhudia msimamo huo ukihama kutoka hali ya kujihami kuelekea hali ya kushambulia," alisema Akraminia.

Alisema mabadiliko hayo yalionekana kupitia hatua za haraka na pana zaidi za kukabiliana na mashambulizi, pamoja na operesheni za awali za kuzuia mashambulizi.

Zawadi ya kuwawinda wanajeshi wa Marekani

Akraminia alisema jeshi pia limeandaa mpango wa kutoa zawadi kwa ajili ya kuua au kuwakamata wanajeshi wa Marekani iwapo kutakuwa na uvamizi wa ardhini katika ardhi ya Iran.

Chini ya mpango huo, alisema, wanachama wa vikosi vya ulinzi au raia wanaomiliki kihalali silaha za uwindaji wangepokea kiasi cha 'toman' bilioni 5—sawa na takriban dola 26,000 za Marekani—kwa kuua au kuwakamata wanajeshi wa Marekani watakaoingia nchini Iran.

Zawadi hiyo ingeongezwa maradufu hadi kufikia 'toman' bilioni 10—sawa na takriban dola 53,000—ikiwa hatua hiyo ingetekelezwa na mwanamke, Akraminia aliongeza.

Alisema jeshi pia lingeinunua silaha iliyotumika kwa bei mara mbili ya thamani yake, kuihifadhi katika makumbusho ya kijeshi kwa jina la mmiliki, na kumpatia mtu huyo silaha nyingine kama hiyo.

Iran yaashiria mabadiliko ya kikanda

Akraminia pia alidai kuwa ushawishi wa Marekani katika eneo hilo umepungua kwa kiasi kikubwa, akitolea mfano kile alichokitaja kuwa ni mfumo wa ulinzi na usalama ulioanzishwa na Saudi Arabia, Uturuki na Pakistan bila kuhusisha Washington.

Alisema kuwa, bila kujali ufanisi wake wa baadaye, mfumo huo unaonyesha kile alichokiita kupungua kwa hadhi ya Marekani katika eneo hilo.

Akraminia aliuelezea mfumo huo kama mfumo wa kwanza wa ulinzi na usalama wa kikanda kuanzishwa bila ushiriki wa Marekani.