Rais William Ruto wa Kenya amesema serikali yake imeiagiza kampuni ya Tata Chemicals Magadi ya nchi ya India kuondoka nchini humo mara moja.

Kampuni hiyo ni mzalishaji mkubwa wa magadi asilia na chumvi barani Afrika.

Akizungumza katika Kaunti ya Kajiado siku ya Alhamisi, Septemba 3, Rais Ruto aliilaumu kampuni hiyo kwa kuendesha shughuli zake katika Ziwa Magadi kwa zaidi ya karne moja bila kufanya uwekezaji wa kutosha au kuunda fursa za kutosha kwa wakazi wa Kaunti ya Kajiado.

Kampuni hiyo ilianza shughuli zake nchini Kenya mwaka wa 1911.

Hatua hiyo ya kusitisha shughuli inafuatia mivutano ya muda mrefu kuhusu leseni, ada za ardhi, na migogoro inayohusu mamilioni ya fedha ambazo hazijalipwa kama ushuru wa eneo hilo na mirahaba.

Alisema serikali imempata mwekezaji mpya wa kuchukua jukumu la kuendesha shughuli katika eneo la Ziwa Magadi chini ya masharti mapya yaliyolenga kuhakikisha kuwa manufaa zaidi ya kiuchumi yanabaki nchini Kenya.