Anthony Joshua na kan hanyar fafatawa da Tyson Fury nan gaba a wannan shekara, in ji mai shirya wasanni, Spencer Brown, wanda ke lura da shirin dawowar Fury na fafatawa da Arslankbek Makhmudov.
Brown ya shaida wa Sky Sports cewa faɗan da aka daɗe ana sa ran yin sa tsakanin waɗannan manyan 'yan damben Birtaniya biyu, na iya tabbata a ƙarshe, muddin Fury ya samu nasara kan Makhmudov.
"Mu je zuwa. A halin yanzu, damben boksin yana samun matsayi na musamman," Brown ya faɗa wa Sky Sports. "Zai kasance kamar wasan ƙarshe na Kofin Duniya na dambe, a ganina. Mun daɗe muna son haka, yanzu lokaci ya yi… Ina tsammanin haka."
Gazawar tattaunawa
Fury da Joshua sun sha zuwa dab da karawa a filin dambe, amma sau da dama sai tattaunawar ta rushe saboda saɓani kan kwantiragi, damuwa kan lafiyar 'yanwasa, da kuma rashin nasarorin da aka samu a wasu wuraren.
An ruwaito cewa tawagoginsu suna kusa da cimma yarjejeniya kafin Joshua ya zaɓi janyewa daga damben bayan haɗarin mota a watan Disamba, wanda ya yi sanadiyyar mutuwar abokai biyu na kusa da shi, waɗanda suke horar da shi.
Joshua, mai shekaru 36, tuntuni ya koma yin atisaye kuma ya kasance a wajen wasan da Derek Chisora ya sha kashi a hannun Deontay Wilder ranar Asabar da ta gabata.
"Ba lallai ina ganin dole ne wannan ne mataki na gaba a wajen AJ ba, idan an duba abin da ya faru da shi," in ji Brown.
"Ina ganin yana da zaɓuɓɓuka biyu da zai yanke. Ko ya shiga kuma ya yi wasan shiri — dole ne ya zaɓi abokin fafatawa da ya dace. Ko AJ ya yi haka, ko kuma ya ce: 'Ka san dai, na riga na yi wasan shirina, zan shiga sansanin horo, zan yi iya ƙoƙarina kuma zan doke Tyson Fury'. Dukanmu muna shirye."
