Gwamnatin Amurka ta ƙaƙaba takunkumai kan wasu ‘yan Nijeriya 18 da wasu ƙungiyoyi kan zargin ta’addanci da laifuka ta intanet da safarar miyagun ƙwayoyi.

Wannan na zuwa ne yayin da Washington ke ƙarfafa haɗin kai na soji da Nijeriya domin daƙile barazanar masu tsattsauran ra’ayi.

A ƙarƙashin shirye-shiryen da ofishin Amurka da ke kula da kadarori na ƙetare (OFAC), an ayyana ɗaiɗaikun mutane da ƙungiyoyi a wani mataki na musamman mai nuna aikata ta’addanci a duniya (SDGT) da jerin barazana masu alaƙa da intanet (CYBER2) da kuma safarar ƙwayoyi (SDNTK).

Boko Haram da ƙungiyoyi masu alaƙa da IS

A cikin waɗanda aka ƙaƙaba wa takunkumi kuma aka ƙwace kadarorinsu sakamakon alaƙa da ƙungiyoyin ‘yanbindiga akwai manyan waɗanda ke da alaƙa da Boko Haram da ISWAP da Ansaru — ƙungiyoyin da suka shafe fiye da shekara goma suna kai hare-hare a arewa maso gabashin Nijeriya.

Cikin waɗanda aka sanya sunayensu a jerin sunayen ‘yanta’adda na duniya akwai tsohon shugaban Boko Haram, Abubakar Shekau da kwamandoji masu alaƙa da ISIS Abu Musab al-Barnawi da Khalid al-Barnawi, tare da wasu masu hulɗa da su da ke da alaƙa da ƙungiyoyin masu tayar da ƙayar baya.

Masu AlakaTRT Afrika - Sojojin Amurka sun isa arewa maso gabashin Nijeriya

Har wa yau akwai Salih Yusuf Adamu da Ibrahim Ali Alhassan da Surajo Abu Bakr Muhammad da Abdurrahman Ado Musa da Ali Abbas Usman Jega.

Kazalika an ƙaƙaba wa reshen Nijeriya na ƙungiyar RIHS mai rajin farfaɗo da Islama domin zargin taimaka wa ayyukan masu tsattsauran ra’ayi.

Takunkumai masu alaƙa da laifukan intanet da safarar ƙayoyi

A wani mataki na daban, an bayyana sunayen wasu ‘yan Nijeriya biyar — wani da ake ce wa Nnamdi Orson Benson da Abiola Ayorinde Kayode da Alex Afolabi Ogunshakin da Micheal Olorunyomi da kuma Richard Izuchukwu Uzuh — a ƙarƙashin dokar hana laifukan intanet ta Amurka US CYBER2 bisa rawar da ake zargin sun taka a wajen shirya manyan damfara ta intanet.

Mutane biyu, wani mai suna Wole A. Ogungbuyi da Babestan Oluwole Ademulero, kuwa an ayyana su a matsayin gaggan masu safarar miyagun ƙwayoyi kan zargin da aka yi musu na kasancewa cikin masu safarar miyagun ƙwayoyi a ƙasashen duniya.