Jiragen rundunar sojin Amurka uku masu ɗauke da sojoji da makamai sun isa Maiduguri, babban birnin Jihar Borno a Nijeriya, wanda hakan wata alama ce ta sabuwar alaƙar soji da tsaro wadda za ta mayar da hankali kan tallafi na tsaro, in ji jami’a.
Jami'ai a Hedikwatar Tsaron Nijeriya sun shaida wa kamfanin dillancin labarai na Anadolu cewa kimanin sojojin Amurka 100 sun isa Nijeriya tsakanin Alhamis da Lahadi a matsayin wani ɓangare na tura rukunin farko, tare da karin jirage da ke tafe a makonni masu zuwa.
"Kamar yadda aka bayyana a makon da ya gabata, sojojin Amurka za su mayar da hankali kan ayyukan da ba na yaki ba kuma za su yi aiki daga cibiyoyin bayar da marni. Aikin su shi ne tallafa wa kokarinmu a nan," in ji wani jami'i da ya nemi a sakaya sunansa a tattaunawarsa da Anadolu a ranar Litnin.
A cikin bayanan da Anadolu ta ruwaito a baya, Manjo Janar Samaila Uba, mai magana da yawun Hedikwatar Tsaron Nijeriya, ya bayyana cewa ma'aikatan Amurka "ba sa aiki a matsayin masu yaƙi kuma ba za su shiga aiki kai tsaye ba.”
Caccakar Amurka
Wannan matakin ya zo ne a yayin da ake samun ƙarin matsin lamba daga shugaban Amurka Donald Trump, wanda ya soki yadda Nijeriya ke tafiyar da martani ga hare-haren da ake kai wa al'ummomin Kirista.
Gwamnatin Nijeriya ta yi watsi da wannan ikirari, inda take cewa al'ummomin Kirista sun sha fuskantar hare-hare masu halaka rayuka, haka kuma fararen-hula Musulmai su ma ana kashe su da yawa a cikin rikicin da ke ci gaba.
A halin yanzu, Nijeriya ta ƙara matakan tsaro na cikin gida, yayin da rundunar soji ta sanar da tura dakaru na musamman zuwa Jihohin Filato da Taraba, waɗanda suka sha fama da tashin hankali akai-akai.
Yayin da jami'an Nijeriya ba su fayyace tsawon lokacin kasancewar sojojin Amurka ba, hukumomin Amurka sun nuna cewa an tsara tura sojojin ne a matsayin na wucin-gadi.
