Turkiyya ta ɗauki dukkan yarjejeniyar zaman lafiyar Gaza da mahimmanci: Erdogan
A tattaunawa ta wayar tarho da takwaransa na Brazil, shugaban Turkiyya ya yaba kan yadda Brazil ta ƙi yin shiru game da kisan kiyashin Gaza.
Shugaban ƙasar Turkiyya Recep Tayyip Erdogan ya tattauna da takwaransa na ƙasar Brazil, Luiz Inacio Lula da Silva, inda ya nuna godiyarsa ga ƙin da Brazil ta yi na yin shiru kan kisan kiyashin Gaza da Isra'ila ta yi.
A wata tattaunawa ta wayar tarho, Erdogan da Lula da Silva sun tattauna batutuwan da suka shafi ɓangarorin biyu, yanki, da kuma duniya baki ɗaya, kamar yadda Hukumar Sadarwa ta Turkiyya ta bayyana a shafin sada zumunta na NSosyal a ranar Laraba.
Ana sa ran Ankara za ta ci gaba da aiki don kawo ƙarshen bala'in jinkai a Gaza, da kuma kafa zaman lafiya, da kuma sake gina yankin Falasɗinu, in ji Erdogan.
Shugaban ƙasar Turkiyya ya kuma ce za su ci gaba da aiki don haɓaka alaƙar ƙasashen biyu a fannoni da dama.
Isra'ila ta kashe Falasdinawa sama da 71,000 tare da raunata sama da 171,000, inda ta lalata kusan kashi 90 cikin 100 na kayayyakin more rayuwa na Gaza a yakin kisan kare dangi da ta yi kan yankin tun daga watan Oktoban 2023.
A cikin sabbin hare-haren da ta kai kan Gaza da yake sabon take yarjejeniyar tsagaita wuta a fili, Isra'ila ta kashe akalla Falasdinawa 11, ciki har da 'yan jarida uku, mata da yara.
Sojojin Isra'ila na ci gaba da mamaye yankunan kudu da gabas na Gaza, da kuma manyan sassan arewacin Gaza, sun mamaye fiye da kashi 50 cikin 100 na yankin.
Tun bayan tsagaita wutar ta fara aiki a ranar 10 ga Oktoban 2025, hare-haren Isra'ila sun kashe Falasdinawa 483 tare da raunata wasu 1,287, yayin da Isra'ila ta takaita shigar da abinci, kayan matsuguni da kayan agajin lafiya zuwa Gaza, inda Falasdinawa kimanin miliyan 2.4 ke zaune cikin mawuyacin hali.