Amurka ta kai hare-hare kan Tsibirin Qeshm na Iran, kamar yadda jaridar The Wall Street Journal ta ruwaito, tana mai ambato wasu jami’an gwamnatin Amurka.
Rahotannin sun ce an kai hare-haren ne a ranar Litinin, a daidai lokacin da Shugaba Donald Trump ke ƙoƙarin rage fargabar yiwuwar sake ɓarkewar babban rikicin soji tsakanin Amurka da Iran a yayin da ake shirin gudanar da zaɓen tsakiyar wa’adin majalisar dokokin Amurka a ranar Talata.
“Wannan matakin kariya ne da aka ɗauka a kan Iran wadda ta yi amfani da makamai masu linzami masu yawa wajen kai hare-haren sama kan kadarorin Amurka,” kamar yadda wani jami’in Amurka ya bayyana.
“Mun yi yaƙi da Iran. Mun yi nasara,” kamar yadda Trump ya shaida wa manema labarai da safiyar ranar, yana mai ƙari da cewa, “Ban ma san ko za a iya kiran abin da ya faru da yaƙi ba, domin ba mu fafata ba tsawon watanni.”
Sai dai wasu jami’an Amurka sun shaida wa jaridar The Wall Street Journal cewa sojojin Amurka sun ci gaba da kai ƙananan hare-hare kan wasu wurare a Iran tsawon makonni.
A cewar rahoton, wasu jami’an Amurka sun bayyana hare-haren a matsayin matakan kariya da aka ɗauka domin hana Iran samun ƙarfin da zai ba ta damar yin barazana ko kai hari kan jiragen kasuwanci da ke wucewa ta Mashigar ruwan Hormuz, wadda ke da matuƙar muhimmanci ga harkokin sufuri da cinikayyar duniya.
An ji a ƙarar fashe-fashe da sanyin safiyar ranar Talata a kudancin ƙasar, ciki har da Tsibirin Qeshm da birnin Bandar Lengeh da ke gaɓar teku, a cewar rahotannin da kamfanonin dillancin labaran Iran suka ruwaito.
Trump ya rage fargabar sake ɓarkewar yaƙi
A ranar Litinin, Trump ya yi watsi da yiwuwar sake kai hare-haren soja kan Iran bayan zaɓen tsakiyar wa’adin majalisar dokoki ta Amurka, yana mai cewa ƙoƙarin diflomasiyya na samun ci gaba.
A yayin tambayar da wani ɗanjarida ya yi wa shugaban na Amurka kan ko yana shirin kai ƙarin hare-hare kan Iran bayan zaɓen, Trump ya amsa da cewa, “A’a.”
Trump ya jaddada ewa Iran ba za ta taɓa mallakar makaman nukiliya ba, yana mai cewa jami’an Iran sun riga sun fahimci matsayar Amurka kan wannan batu.
Ya ce, hana Tehran mallakar ƙarfin nukiliya na da muhimmanci matuƙa, yana mai gargaɗin cewa ƙasar ba za ta iya ci gaba da tafiyar da al’amuranta kamar yadda take yi a yanzu ba idan ta samu irin wannan ƙarfin.
“Mun dakatar da hakan a shekarar da ta wuce ta hanyar amfani da manyan jiragen yaƙinmu samfurin B-2, waɗanda suka kai hari kan dukkan wuraren kuma suka binne komai a ƙarƙashin ɗaruruwan tan na duwatsu,” in ji Trump.
Shugaban Amurkan ya kuma nuna cewa tattaunawar diflomasiyya na tafiya yadda ya kamata, yana mai danganta yiwuwar cim ma yarjejeniya da raguwar farashin makamashi.
“Wataƙila hakan ne ya sa farashin mai ya faɗi sosai” in ji shi.
