Akiingia uwanjani dhidi ya Korea Kusini katika mechi ya pili ya Morocco ya Kombe la Dunia la Wanawake, mlinzi Nouhaila Benzina aliweka historia kama mchezaji wa kwanza kuvaa hijab alipokuwa akishiriki mashindano ya kimataifa ya ngazi ya juu.
Marufuku ya FIFA ya kucheza kwa mavazi ya kidini katika michezo yake iliyoidhinishwa kwa "sababu za kiafya na usalama" ilibatilishwa mnamo 2014 baada ya utetezi kutoka kwa wanaharakati, wanariadha na maafisa wa serikali na kandanda.
"Sina shaka kwamba wanawake wengi zaidi na wasichana wa Kiislamu watamtazama Benzina na kupata msukumo - sio tu wachezaji, lakini nadhani watoa maamuzi, makocha, michezo mingine pia," mwanzilishi mwenza wa shirika la wanwake katika michezo Assmaah Helal alisema Jumapili.
Benzina anacheza kandanda ya kulipwa katika klabu ya 'Sports of Forces Armed Royal' - bingwa mara nane katika ligi kuu ya wanawake ya Morocco.
Hakucheza mechi ya ufunguzi ya Morocco ilipopoteza kwa mabao 6-0 dhidi ya Ujerumani mjini Melbourne na ilimbidi kusubiri siku sita ili hatimaye kuanza katika mchezo wao wa pili wa Kundi H mjini Adelaide.
Morocco ni taifa la kwanza la Kiarabu au Afrika Kaskazini kufuzu kwa Kombe la Dunia la Wanawake.
Atlas Lionesses iliorodheshwa nambari 72 duniani kabla ya mchuano huo na walilemewa na bingwa mara mbili Ujerumani, ambayo imeshika nafasi ya pili. Lakini timu ya Morocco ilicheza kwa uhuru zaidi katika mchezo wa mchana dhidi ya Korea Kusini na kufunga bao la ufunguzi.
"Tuna heshima ya kuwa nchi ya kwanza ya Kiarabu kushiriki katika Kombe la Dunia la Wanawake," nahodha wa Morocco Ghizlane Chebbak aliwaambia waandishi wa habari kabla ya mashindano, "na tunahisi kwamba tunapaswa kubeba jukumu kubwa la kutoa picha nzuri, kuonyesha mafanikio ambayo timu ya Morocco imepata.” Aliongeza.
