Jimbo la kaskazini katikati mwa Nigeria la Plateau limethibitisha karibu maambukizi 11,000 ya Kifua Kikuu mwaka 2026, huku wagonjwa 2,047 wakitambuliwa na kutibiwa kati ya mwezi Julai na Septemba, afisa mmoja wa afya amesema.

Yohanna Bot, afisa wa kutathmini maambukizi ya Kifua Kikuu katika jimbo hilo, aliwaambia waandishi wa habari katika mkutano mji mkuu wa jimbo, Jos Jumapili jioni.

Bot, katika taarifa kwa Anadolu, alisema kuwa ugonjwa huo uliokadiriwa kuwa na maambukizi 219 kwa watu 100,000. Aliongeza kuwa wagonjwa waliotambuliwa wanaendelea kutibiwa katika vituo mbalimbali vya afya kwenye jimbo hilo.

Taarifa za kupotosha kuhusu Kifua Kikuu

Afisa huyo alionya kuwa unyanyapaa na taarifa za kupotosha kuhusu ugonjwa huo zinafanya baadhi ya wakazi kushindwa kutafuta matibabu.

Baadhi ya watu, anasema, bado wananasibisha ugonjwa wa Kifua Kikuu na sababu za kiimani pamoja na matambiko.

Ukosefu wa usalama na watu kuondolewa kwenye makazi yao kunakwamisha juhudi za kutambua na kutibu maambukizi, hasa eneo la Mangu, Jos Kusini na Barkin Ladi, ambapo vurugu zimesababisha wakazi kukimbilia kwenye makambi.

Nigeria bado ni moja ya nchi zenye maambukizi mengi ya ugonjwa wa Kifua Kikuu duniani.

Ugonjwa huu unaweza kukingwa na kutibiwa, lakini kuchelewa kuutambua, kutofikia matibabu na kunyanyapaa kunaendelea kuwa changamoto katika kukabiliana na maambukizi.