Rundunar Sojin Amurka mai kula da Afirka, AFRICOM, ta ce an aika sabbin kayayyakin soji zuwa Nijeriya, inda ta ce isar da kayan aikin wata alama ce ta ƙara ƙarfafa haɗin gwiwar tsaro tsakanin ƙasashen biyu.

A sanarwar da ta yi a shafinta na X a ranar Alhamis, AFRICOM ta ce kayan aikin, waɗanda suka isa Nijeriya a ƙarshen mako, ana sa ran za su ƙara wa ƙasar ƙarfin tunkarar ta’addanci da sauran barazanar tsaro.

AFRICOM ta ce an samar da kayan ne ƙarƙashin yarjejeniyar sayar da kayan aikin soji ta ƙasashen waje, wadda aka tsara domin ƙara zurfafa haɗin gwiwar tsaro da harkokin soji tsakanin Amurka da Nijeriya.

Isar da kayan na zuwa ne a daidai lokacin da Nijeriya ke ci gaba da yaƙi da ƙungiyoyin ’yan ta’adda da masu tayar da ƙayar baya, tare da neman ƙarin tallafin ƙasa da ƙasa domin ayyukanta na yaƙi da ta’addanci.

Amfani da jirgin C-17 Globemaster III wajen kai kayan ya kuma nuna muhimmancin ɓangaren sufuri da jigilar kayan soji a cikin wannan haɗin gwiwa, inda ake iya kai kayan aikin soji kai tsaye domin biyan buƙatun tsaron Nijeriya.

AFRICOM ba ta bayyana irin kayan aikin da aka kawo ba, ko kuma ƙimarsu.

Dangantakar Amurka da Nijeriya ta samu wani gagarumin sauyi bayan Shugaban Amurka Donald Trump ya sake sanya Nijeriya cikin jerin ƙasashen da Amurka ke kallonsu a matsayin “Country of Particular Concern”, wato ƙasa da ke da matuƙar damuwa ta musamman.

Trump ya zargi gwamnatin Shugaba Bola Ahmed Tinubu da yin sakaci da kashe-kashen da ake yi, har ma ya yi barazanar kai hari Nijeriya.

Sai dai gwamnatin tarayyar Nijeriya ta aika da wata tawaga mai ƙarfi zuwa Washington, yayin da wata tawagar Amurka ita ma ta ziyarci Nijeriya.

Daga bisani, Amurka ta tura jami’an rundunonin musamman zuwa Nijeriya, kuma ƙasashen biyu sun gudanar da wasu ayyukan soji na musamman da aka kai wa taƙamaiman wurare.