Darajar kuɗin Sudan ta faɗi zuwa fam 10,000 na Sudan kan kowace dala ɗaya a kasuwar canjin kuɗi ta bayan fage a ranar Laraba, yayin da yaƙin da ake ci gaba da yi ke ƙara jefa tattalin arzikin ƙasar cikin matsin lamba.

Faɗuwar darajar kuɗin da kashi 60 cikin 100 ta ƙara tsananta wa ’yan ƙasar halin ƙunci.

A hukumance, farashin dala ɗaya ya tsaya a fam 4,200 na Sudan, wanda shi ne farashin da aka gani a kasuwar bayan fage a watan Mayun 2026.

Babban ɓangare na wannan faɗuwar ya faru ne a cikin watan da ya gabata, lokacin da darajar fam ɗin ta sauka daga 8,000 zuwa 10,000 kan kowace dala, wato ta sake raguwa da kashi 20 cikin 100. Kafin fara yaƙin a watan Afrilun 2023, ana musayar dala ɗaya kan kusan fam 600 na Sudan.

Ƙaruwar buƙatar shigo da kayayyaki

’Yan kasuwar canjin kuɗi sun ce buƙatar shigo da kayayyaki daga ƙasashen waje na daga cikin manyan dalilan faɗuwar darajar kuɗin. Hakan na zuwa ne yayin da gwamnati ta ƙara farashin dala da ake amfani da shi wajen lissafa harajin kwastam zuwa sama da fam 5,600 a wannan makon.

Yayin da yaƙin ke ci gaba, Sudan ta rage samar da wasu muhimman kayayyakin da take fitarwa don samun dalar Amurka. Haka kuma, yaƙin ya kawo cikas ga samarwa da jigilar zinare, wanda shi ne babban kayan da ƙasar ke fitarwa zuwa ƙasashen waje.

A halin da ake ciki, gwamnatin Sudan ta ce yaƙin da kuma ayyukan sake gina ƙasar sun ƙara buƙatar shigo da kayayyaki daga ƙasashen waje, lamarin da ke haifar da ƙarin buƙatar dalar Amurka.