Madaxweynaha Jamhuuriyadda Jabuuti, Ismaaciil Cumar Geelle, ayaa subaxnimadii Isniinta Aqalka Madaxtooyada ku qaabilay ergey gaar ah oo siday farriin qoraal ah oo ka timid dhiggiisa dalka Ruwaanda, Madaxweyne Paul Kagame.
Farriintan ayaa diiradda lagu saaray xoojinta xiriirka labada dal iyo loolanka loogu jiro hoggaanka ururrada caalamiga ah.
Wasiirka Arrimaha Dibadda iyo Iskaashiga Caalamiga ah ee Ruwaanda, Olivier Nduhungirehe, oo ahaa ergeyga farriinta siday, ayaa Madaxweyne Geelle hordhigay codsi rasmi ah oo ku saabsan in dowladda Jabuuti ay taageerto dib u doorashada Louise Mushikiwabo.
Mushikiwabo ayaa markale u taagan xilka Xoghayaha Guud ee Ururka Caalamiga ah ee La Francophonie (OIF).
Intii uu socday kulanka dhex maray Madaxweynaha iyo ergeyga, waxaa lagu nuuxnuuxsaday muhiimadda ay leedahay in Mushikiwabo loo kordhiyo muddada xileedka. Waxaa la isku raacay in haddii la doorto ay fursad u heli doonto sii ambaqaadista qorshayaasha casriyeynta ee ay ka dhex billowday ururka OIF, kuwaas oo horay u helay taageero ballaran oo caalami ah.
Sidoo kale, wadahadallada ayaa lagu lafaguray sidii dib u doorashadeedu ay wax uga beddeli lahayd loolanka luuqadaha iyo dhaqanka ee gobolka Bariga Afrika. Waxaa la tilmaamay in hoggaankeedu uu kor u qaadi doono saamaynta luuqadda Faransiiska iyo kala duwanaanshiyaha dhaqanka ee gobolka, halkaas oo hadda ay aad ugu xooggan tahay saamaynta luuqadda Ingiriisku.
Marka laga soo tago arrinta doorashada, Madaxweyne Ismaaciil Cumar Geelle iyo ergeyga Ruwaanda waxay si qoto dheer uga wadahadleen xiriirka saaxiibtinnimo iyo iskaashiga istaraatiijiyadeed ee u dhexeeya labada dal iyo labada shacab ee walaalaha ah. Labada dhinac ayaa isweydaarsaday aragtiyo ku saabsan arrimo dhowr ah oo ay dani ugu jirto qaaradda Afrika iyo guud ahaan xaaladaha cakiran ee caalamka ka jira.
Munaasabadda qaabilaadda waxaa dhanka Ruwaanda ku weheliyey Wasiirka, Safiirka Ruwaanda u fadhiya Jabuuti oo fadhigiisu yahay Addis Ababa, Charles Karamba.
Dhanka dowladda Jabuuti, waxaa kulanka goobjoog ka ahaa Wasiirka Arrimaha Dibadda iyo Iskaashiga Caalamiga ah, Cabdulqaadir Xuseen Cumar, iyo Safiirka Jabuuti u fadhiya Ruwaanda, Cabdi Maxamuud Aybeh.
