Taliska Dhexe ee Mareykanka (CENTCOM) ayaa Isniintii beeniyay sheegashooyin dhowaan ay soo jeediyeen Ciidanka Ilaalada Kacaanka Islaamiga ah ee Iiraan (IRGC) oo sheegay in Tehran ay burburisay dhowr diyaarado dagaal oo Mareykan ah oo ku sugan gobolka.

“IRGC ee Iiraan waxay sheegtay inay dhowaan burburisay dhowr diyaarado dagaal oo Mareykan ah oo ku sugan gobolka iyadoo adeegsaneysa gantaallo iyo drone. Taasi waa been-abuur, ma jiraan wax diyaarado dagaal oo Mareykan ah oo ay soo ridday Iiraan ,” ayuu CENTCOM ku yiri barta X.

Taliska ayaa sheegay in diyaaradaha dagaalka ee Ciidanka Badda, Ciidanka Cirka iyo Marines-ka Mareykanka ay sii wadaan muujinta “awood dagaal oo aan lala tartami karin iyo sarreynta hawada” inta lagu jiro weerarrada lagu qaadayo Iiraan.

Xiisadaha Bariga Dhexe ayaa sii kordhay tan iyo markii Mareykanka iyo Israa’iil ay 28-kii Febraayo weerar ballaaran ku qaadeen Iiraan, taasoo dishay in ka badan 1,300 qof, oo ay ku jiraan hoggaamiyihii sare ee markaas ee Iiraan Ali Khamenei.

Iiraan ayaa uga jawaabtay weerarro drone iyo gantaallo ah oo lagu beegsaday Israa’iil, Urdun, Ciraaq iyo dalalka Gacanka ee ay ku yaallaan saldhigyada milatari ee Mareykanka.

Wadar ahaan 13 askari oo Mareykan ah ayaa la dilay, ku dhowaad 200 kalena waa la dhaawacay tan iyo markii howlgalka la bilaabay.