Turkiga ayaa soo dhoweynaya xabbad-joojinta Talaadadii laga gaaray Suuriya, sida uu sheegay Madaxweynaha Turkiga Recep Tayyip Erdogan, isagoo muujiyay rajo ah in ay horseedi doonto xal waara oo aan dhiig dambe ku daadan.

Isagoo Arbacadii khudbad ka jeedinayay baarlamaanka, lana hadlayay xubnaha xisbigiisa talada haya ee Cadaaladda iyo Horumarka (AK Party), Erdogan ayaa sheegay in Ankara ay “bilowgii horeba si adag u difaacday” ilaalinta midnimada siyaasadeed iyo dhulkeed ee Suuriya.

Madaxweynaha Suuriya ayaa Talaadadii ku dhawaaqay in la gaaray is-afgarad lala yeeshay kooxda argagixisada YPG, kaas oo siinaya muddo afar maalmood ah si loo dejiyo hannaan lagu hirgelinayo ku biirinta Hasakah, muddadaas oo xabbad-joojintu ay sii jiri doonto. YPG ayaa markii dambe bayaan ay soo saartay ku sheegtay in ay si buuxda uga go’an tahay xabbad-joojinta.

Erdogan ayaa ka digay in isku day kasta oo kicin ama qalalaase laga sameeyo Suuriya wixii hadda ka dambeeya uu “la mid noqon doono ismiidaamin,” isagoo carrabka ku adkeeyay in xasilloonida la ilaaliyo.

Wuxuu sheegay in is-dhexgal buuxa oo ka hirgala Suuriya uu “furayo marxalad cusub,” isagoo intaas ku daray in faa’iidada xasilloonida ay si gaar ah u dareemi doonaan Kurdiyiinta Suuriya.

“Dan kama lihin dhulka dal kale mana faragelinno arrimaha gudaha ee qaran kale, balse ma oggolaan doonno in danaha dalkeenna la waxyeelleeyo,” ayuu yiri Erdogan.

Madaxweynaha Turkiga ayaa sidoo kale sheegay in uu khadka taleefanka uga wada hadlay Madaxweynaha Mareykanka Donald Trump arrimo dhowr ah, oo ay ka mid yihiin kuwo “ka qayb qaadanaya amniga Suuriya,” sida iskaashi wadajir ah oo lagula dagaallamayo Daacish.