Mpishi wa Nigeria, Hilda Effiong Bassey, anayejulikana sana kama Hilda Baci, amekamilisha jaribio lake la kuweka rekodi ya dunia kwa kupika sufuria kubwa zaidi ya wali wa jollof baada ya kikao cha kupika cha saa nane.

Hili ni jaribio lake la hivi karibuni la rekodi ya dunia baada ya kuingia kwenye vitabu vya rekodi mwaka 2023 kwa kupika kwa muda mrefu zaidi duniani kama mtu binafsi.

Baci alisema kuwa mapishi yake ya jollof yalihusisha kilo 4,000 za wali, katoni 500 za tomato paste, kilo 750 za mafuta, na kilo 600 za vitunguu vilivyopikwa kwenye sufuria yenye upana wa mita sita.

Kikao hicho cha kupika kilifanyika kwenye uwanja wazi katika kitovu cha kibiashara, Lagos, na kilivutia mamia ya watazamaji.

Jaribio lake lazima lithibitishwe na shirika la Guinness World Records.

Wali wa jollof ni chakula kikuu kinachopendwa kote katika ukanda wa Afrika Magharibi, huku Nigeria, Ghana, Senegal, Cameroon, na Gambia zote zikidai kuwa na mapishi bora zaidi.

Mwaka 2023, Shirika la Umoja wa Mataifa la Elimu, Sayansi, na Utamaduni (UNESCO) lilitambua Senegal kama chimbuko la ladha hii ya kipekee ya upishi.

Inasadikika kuwa wali wa jollof ulianzia kwa watu wa Wolof wa Senegal.