Wasaaradda caafimaadka Suudaan ayaa shaacisay in la diiwaangeliyey 1,307 kiis oo cusub oo kolera ah iyo 18 dhimasho ah oo la xiriira cudurka toddobaad gudihiis.

Bayaan ay soo saartay wasaaraddu Talaadadii, ayaa lagu sheegay in kiisaskan laga diiwaangeliyay 12 ka mid ah 18-ka gobol ee Suudaan intii u dhaxaysay 12-kii ilaa 18-kii Luulyo, taas oo tirada guud ee kiisaska tan iyo bilowgii cudurka bishii Agoosto 2024 ka dhigaysa 91,034 oo kiis, oo ay ku jiraan 2,302 dhimasho oo ka dhacay 17 gobol.

Tirada ugu badan ee kiisaska toddobaadkii hore waxaa laga diiwaangeliyay Tawila, Waqooyiga Darfur, oo gaartay 519 kiis, halka 236 kiis laga helay Qeissan ee Gobolka Blue Nile.

Marka la barbar dhigo, wasaaraddu waxay toddobaadkii hore, inta u dhaxaysay 5-tii ilaa 11-kii Luulyo, soo warisay 674 kiis oo kolera ah iyo 13 dhimasho.

Burburka kaabayaasha Suudaan

Cudurka koleraha ee haatan ka dillaacay dalka ayaa ku soo beegmay burbur ballaaran oo ku yimid kaabayaasha Suudaan sababo la xiriira dagaalka u dhexeeya ciidanka milatariga iyo xoogagga gurmadka degdegga ah ee RSF.

Ciidanka iyo RSF ayaa awoodda ku loollamayey tan iyo Abriil 2023, iyadoo dagaalkooda ay ku dhinteen in ka badan 20,000 qof, halka 14 milyan oo kale ay ku barakaceen, sida ay sheegayaan Qaramada Midoobay iyo mas'uuliyiinta maxalliga ah.

Si kastaba ha ahaatee, cilmi-baaris laga sameeyay jaamacadaha Mareykanka ayaa ku qiyaasay tirada dhimashada inay gaareyso ilaa 130,000.