Wasiirka Awqaafta iyo Arrimaha Diinta ee Soomaaliya, Sheekh Mukhtaar Roobow Cali, oo booqasho rasmi ah ku joogay Jamhuuriyadda Jabuuti toddobaadkan, ayaa booqday Madaxweynaha Jabuuti, Ismaaciil Cumar Geelle.
Wasiirka oo uu wehlinayey dhiggiisa Jabuuti, Mumin Xasan Barre, ayaa uga mahadceliyay Madaxweynaha taageeradiisa joogtada ah iyo kaalinta uu mar walba ka qaato garab istaagga Soomaaliya.
Wasiir Roobow ayaa ku tilmaamay Madaxweyne Geelle “Badbaadiyaha Soomaaliya” kaddib burburkii dowladdii dhexe 1991, isaga oo xusay doorkii uu ka qaatay martigelinta Shirka Nabadda ee Carta sannadkii 2000, kaas oo horseeday dib u soo celinta Jamhuuriyadda Saddexaad ee Soomaaliya.
Wasiirka ayaa sidoo kale uga mahadceliyay Madaxweynaha iyo Wasiirka Awqaafta ee Jabuuti soo dhoweyntii diirranayd ee walaaltinimo ee loo sameeyay isaga iyo wafdigiisa.
Ugu dambeyn, Sheekh Mukhtaar Roobow ayaa sheegay in Wasaaradda Awqaafta iyo Arrimaha Diinta ee Soomaaliya ay qorsheyneyso in dalka lagu hirgeliyo mashaariicda iyo casharrada laga bartay Jabuuti, oo ay ka mid yihiin dhismaha awqaafta, diiwaangelinta zakada, iyo aasaasidda machad diimeedyo dhexdhexaadnimo ku dhisan oo faafiya dhaqanka nabadda, sida Machadka Al-Wasatiya ee Jabuuti.
