Senegal imesema itakata rufaa baada ya kupokonywa taji la Kombe la Mataifa ya Afrika siku ya Jumanne na Shirikisho la Soka la Afrika (CAF) badala yake Morocco kutangazwa mabingwa. Hii ni miezi miwili baada ya fainali iliyogubikwa na hali ya vurugu.

Shirikisho la Soka la Senegal limesema litakata rufaa "haraka iwezekanavyo" katika Mahakama ya Usuluhishi wa Michezo.

"Shirikisho la Soka la Senegal linalaani uamuzi huu usio wa haki, ambao haujawahi kutokea na usiokubalika, ambao unaleta sifa mbaya kwa soka ya Afrika," lilisema katika taarifa yake.

Wachezaji kadhaa wa Senegal walitoka nje ya uwanja kwa utata mjini Rabat wakati wa fainali za Januari 18 wakipinga wenyeji walipopewa penalti mwishoni mwa kipindi cha pili.

Baada ya wachezaji wa Senegal kurejea uwanjani wakiwa wameshawishiwa na nahodha wao Sadio Mane, Morocco walikosa penalti hiyo na Pape Gueye akafunga bao hilo katika muda wa nyongeza na kuipa timu yake ushindi wa 1-0.

CAF ilisema kwamba baada ya kuchunguza rufaa ya Morocco, "timu ya taifa ya Senegal imetangazwa kupoteza mechi" na matokeo "yalirekodiwa rasmi kuwa 3-0" kwa manufaa ya Morocco.

Kamati ya Rufaa ya CAF ilihalalisha uamuzi wake kwa kutumia vifungu vya 82 na 84 vya Kanuni za AFCON, ambavyo vinaeleza kuwa iwapo timu "itakataa kucheza au kuondoka uwanjani kabla ya kumalizika kwa kawaida kwa mechi bila kibali cha mwamuzi, itazingatiwa (iliyoshindwa) na itatolewa kwenye mashindano ya sasa."

Nakala hizo zinaongeza kuwa timu inayokiuka kanuni "itapoteza mechi yake kwa mabao 3-0."

Shirikisho la Soka la Kifalme la Morocco (FRMF) lilisema katika taarifa rufaa yake "haikuwa na lengo la kupinga utendaji wa michezo wa timu zinazoshiriki katika mashindano haya, lakini tu kuomba matumizi ya haki kwa kanuni za mashindano."

"Shirikisho linasisitiza dhamira yake ya kuheshimu sheria, kwa uwazi wa mfumo wa ushindani, na utulivu wa mashindano ya Afrika," iliongeza taarifa hiyo.