Turkey President Recep Tayyip Erdogan don talk say im dey happy wit di ceasefire wey dem agree between Israel and Palestinian resistance group Hamas afta di negotiation wey happen for Sharm el-Sheikh. Turkey sef follow play role for di mata.

For statement wey im give on Thursday, Erdogan thank United States President Donald Trump for di political will wey e show to push Israel make dem agree ceasefire. E still thank Qatar and Egypt for di big support wey dem give to make di agreement work.

Di Turkey president tok say dem go dey monitor how di agreement go take work and dem ready to still contribute for di peace process. E still tok say Ankara no go change dia stand for di matter of independent Palestinian state wey go dey based on di 1967 borders, wit East Jerusalem as di capital.

Erdogan show solidarity wit Palestinians wey don suffer well-well and lose plenty tins for di past two years. E praise dem for di way dem take show resilience and dignity even wit di hard condition wey dem dey face.

Di signing of di agreement for di first stage of Trump plan for Gaza go happen by 0900 GMT, na wetin one source wey sabi di agreement tok give Reuters on Thursday.

Di ceasefire go start for ground for Gaza once dem don sign di deal, di source add. Qatar, Egypt, di US, and Turkey don sign as di guarantors for di Gaza peace deal, na wetin The Jerusalem Post report.

Israel and Hamas don agree for di ceasefire deal wey dem don dey wait for long. Na di first phase of Trump plan to end di war for Gaza wey don kill more than 67,000 Palestinians and change di face of di Middle East.

Di deal go cover three main tins: release of Israeli captives and Palestinian prisoners, withdrawal of Israeli troops go one line wey dem agree, and make aid wey Gaza need badly enter di place afta di years of blockade and war.