US Presido Donald Trump talk say FIFA World Cup matches wey dem plan to play for American cities next year fit comot go oda cities if local officials no fit guarantee security.

As e respond to question about wetin fit happen if FIFA move the games go oda cities, Trump say governors and mayors 'go gats behave,' and e point specifically to California.

'For California matter, una get problem — crime dey high,' na im e talk, and e add say some parts of the state don recently suffer serious wildfires.

'If we no enter, as per crime matter, na disaster we for don get,' e talk.

Trump talk say e for like make Los Angeles host the matches as dem plan, but e stress say federal government must fit help if dem need am.

'If dem want help for this, I go like send National Guard, or anybody wey necessary, to help dem. I want make am better. I for like make e for Los Angeles,' na so e talk.

United States go host World Cup matches for 11 cities during June and July 2026 as dem dey co-host the tournament with Mexico and Canada.

Tickets go easier

Trump still talk say country go fast-track visas for foreign visitors wey get tickets to the World Cup matches wey go hold next year for 11 US cities.

Washington go set up scheduling system for visa-interview appointments wey go prioritise foreign fans wey dey attend the World Cup. The matches go run from June 11 to July 19.

For Oval Office, Trump tell reporters say government agencies don work 'to make sure say soccer fans from all over the world dem proper vet and fit come US next summer without wahala.'

Secretary of State Marco Rubio talk say State Department don add 400 consular officers to process visas, na double the number for some countries.

'US dey offer prioritised appointments so fans fit complete their visa interviews and show say dem qualify,' Rubio talk.

For White House, FIFA President Gianni Infantino talk say 5 million to 10 million people go come the US for the matches.

FIFA talk say fans from 212 countries don buy over one million tickets so far.