Govnor of Kano State, Alhaji Abba Kabir Yusuf, don approve one full welfare plan for the man wey lose im six pikin and him wife wey dem murder for Chiranci Dorayi area of Kano State.

Di plan include to pay for Hajji and Umrah for am, give am new house, and provide full welfare support.

Dem announce dis one inside statement wey spokesman Sunusi Bature Dawakin Tofa sign on Thursday.

Govnor Yusuf talk dis one when e do condolence visit go meet family of the dead; e show deep sympathy and assure them say state government go help the father rebuild him life.

E order make dem provide better house for am, and promise government go support make e fit marry again and rejoin community life.

For matter of justice, the Govnor direct Kano State Attorney-General and Commissioner for Justice make dem quick arraign the suspects wey involve for the killing. E say any person wey court find guilty go face full punishment.

Govnor Yusuf still say e go sign to carry out death sentence against anybody wey court find guilty for the Chiranci Dorayi killing. E add say this step go also cover those wey kill Hanifa and the person wey burn mosque for Gezawa, once courts don give them appropriate sentences.

E thank Nigeria Police, the DSS and other security agencies for their quick work and cooperation wey lead to the arrest of the suspects.

To show gratitude for the government's support, the family head don donate him own house to Kano State Government so dem fit build Islamiyya school wey go serve the community.