Gabon government don announce say dem suspend di national team, sack di coach and comot Pierre‑Emerick Aubameyang from di squad after dem suffer three defeats for di Africa Cup of Nations finals.

Gabon Minister for Sports announce for television say dem suspend di national team after dem finish last for dia group and get eliminate from di tournament wey dey Morocco.

“Because of di Panthers disgraceful performance for di Africa Cup of Nations, di government don decide to dissolve di coaching staff, suspend di national team until further notice, and exclude players Bruno Ecuele Manga and Pierre‑Emerick Aubameyang,” actin sports minister Simplice‑Desire Mamboula talk after Wednesday’s 3-2 loss to Côte d'Ivoire for Marrakech.

Gabon, wey Thierry Mouyouma — a former defender — coach, don already dey eliminated after dem lose dia opening two Group F fixtures to Cameroon and Mozambique, but for dia final match dem lead 2-0 against di defending champions before dem concede three goals and lose to a second‑string Ivorian lineup.

Aubameyang - Injury

Neither Aubameyang nor di veteran defender Ecuele Manga play on Wednesday, as Aubameyang don return to im French club Olympique de Marseille for treatment on a thigh injury.

Di former African Footballer of di Year respond for social media, write for X: "I think say di team's problems deep pass just di individual wey I be."

Aubameyang, wey dey 36 years old, e fit be say im don play im last game for Gabon for di defeat to Mozambique; same kin ting fit apply to di 37‑year‑old former Cardiff City defender Ecuele Manga.

For before, disbanding di national team na common reaction to bad results, but since FIFA don take strong stand against government interference for how dem run football associations, dis kain thing don rare.