Madaxweynaha Mareykanka Donald Trump ayaa sheegay in NATO ay wajihi doonto mustaqbal “aad u xun” haddii xulafada Mareykanku aysan gacan ka geysan furitaanka Marinka Hormuz, oo ah marin muhiim u ah gaadiidka shiidaalka oo ay xirtay Iiraan.
Wareysi kooban oo uu Axaddii siiyay The Financial Times, Trump ayaa sheegay in sida Mareykanku uga caawiyay Ukraine dagaalka ay kula jirto Ruushka, uu ka filayo Yurub inay gacan ka geysato arrinta Marinka Hormuz, oo xiritaankiisu uu sare u qaaday qiimaha tamarta ee adduunka oo dhan.
“Haddii aan wax jawaab ah la helin ama ay noqoto jawaab taban, waxaan u maleynayaa inay taasi aad ugu xumaan doonto mustaqbalka NATO,” ayuu yiri Trump, oo sannado badan dhaliilayay isbahaysiga isagoo ku eedeeyay inuu ku tiirsan yahay kharashaadka Mareykanka.
“Waa wax ku habboon in dadka ka faa’iideysta Marinkan ay ka caawiyaan in la hubiyo in wax xun aysan halkaas ka dhicin,” ayuu yiri Trump.
Markii wax laga weydiiyay nooca taageerada uu doonayo, Trump ayaa u sheegay FT inuu doonayo maraakiib miinooyinka ka saara badda iyo sidoo kale “dad awood u leh inay ka hortagaan falal xun oo ka yimaada xeebta [Iiraan].”
Heshiis lala galo Iiraan
Trump ayaa sheegay inuu wada hadallo ku saabsan sugidda amniga Marinka Hormuz la leeyahay toddobo dal.
Wuxuu sidoo kale sheegay in Washington ay xiriir la leedahay Iiraan balse uu shaki ka muujiyay in Tehran ay diyaar u tahay wada hadallo dhab ah oo lagu soo afjaro colaadda.
Trump ayaa wariyeyaasha u sheegay isagoo saaran Air Force One in maamulkiisu uu la hadlayo Iiraan, “laakiin uma maleynayo inay diyaar u yihiin.”
Hubanti la’aanta ku saabsan muddada uu socon karo dagaalka ka dhanka ah Iiraan ayaa ruxday suuqyada saliidda, halkaas oo qiimaha saliidda ceyriinka ah uu sare u kacay labadii toddobaad ee la soo dhaafay sababo la xiriira khataraha sahayda.
Axaddii, qiimaha saliidda ee Mareykanka ee West Texas Intermediate ayaa furmay isagoo 2.5% kor u kacay oo gaaray $100.22 foostadiiba, halka qiimaha Brent, oo ah cabbirka caalamiga ah, uu kor u kacay 2.9% oo gaaray $106.11 foostadiiba.
